Moskvadakı Xalq Təsərrüfatı Nailiyyətləri Sərgisində (XTNS) Rusiya Rəssamlarının Yaradıcılıq İttifaqının və Beynəlxalq Rəssamlar Federasiyasının üzvü, Rusiya və Azərbaycanda tanınan fırça ustası Bayram Salamovun fərdi sərgisi açılıb.
Kulis.az xəbər verir ki, Uşaqların Beynəlxalq Müdafiəsi Gününə həsr olunmuş “Şəhərlərin melodiyası” adlı sərgidə rəssamın 20-dən çox rəsm əsəri nümayiş etdirilir.
“Azərbaycan” pavilyonunun direktoru Səadət Qədirova jurnalistlərlə söhbətində qeyd edib ki, Bayram Salamovun əsərlərinin parlaq palitrası və maraqlı mövzuları heç kəsi laqeyd qoymur. “Sərgi Uşaqların Beynəlxalq Müdafiəsi Gününə həsr olunub. Düşünürəm ki, sərgi bu bayramla vəhdət təşkil edir. Bayram Salamovun rəsmləri kortəbii, rəngarəng və canlıdır, uşağın dünyaya baxışını çatdırır. Rəssam rəng sxemləri və maraqlı hekayələri ilə tamaşaçılara Azərbaycan haqqında danışır”, - deyə pavilyonun direktoru bildirib.
Rəssam Bayram Salamov çıxışında sərginin təşkilinə görə “Azərbaycan” pavilyonuna təşəkkür edib və Azərbaycan rəssamlıq məktəbinin zəngin ənənələrini qeyd edib.
Bayram Salamov Azərbaycanın Şəki rayonunun Qoxmuq kəndində anadan olub. 1986-cı ildə Əzim Əzimzadə adına Azərbaycan Dövlət Rəssamlıq Məktəbini bitirib, Şəki Dram Teatrında dekorasiya rəssamı kimi fəaliyyət göstərib, sonra Tolyatti şəhərində öz şedevrlərini yaradıb və 2010-cu ildə ümdə arzusunu həyata keçirərək “Bayram Art Gallery” adlı şəxsi rəsm studiyasını açıb.
Rəssamın əsərləri Rusiyanın bir çox şəhərlərində, həmçinin Azərbaycan, Almaniya, İtaliya, Çexiya və Kiprdə keçirilən sərgilərdə nümayiş etdirilib. Onun tablolarına Tolyatti İncəsənət Muzeyinin və Mordoviya İncəsənət Muzeyinin kolleksiyalarında rast gəlmək olar. Bundan başqa, fırça ustasının rəsmləri Rusiya, İspaniya, Böyük Britaniya, Almaniya, Kipr, Çexiya, İtaliya və Kanada kolleksiyaçılarının şəxsi kolleksiyalarına da daxil edilib.
Bizi Telegram-da izləyin
t.me/kulis_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
Ana səhifə
Reels
Yazarlar
Xəbərlər