Azərbaycan Respublikası Prezidentinin 2025-ci il 29 may tarixli Sərəncamının icrası çərçivəsində Nazirlər Kabineti tərəfindən ölkəmizdə ilk dəfə olaraq “Filmlərin istehsalı üçün çəkilmiş xərclərin qismən geri ödənilməsi Qaydaları” təsdiq edilib.

Kulis.az xəbər verir ki, yeni Qaydalar, Azərbaycan ərazisində yerli və xarici istehsalçılar tərəfindən kinematoqrafiya əsərləri və digər audiovizual məhsulların istehsalının təşviqinə, sahəyə investisiya cəlbediciliyinin artırılmasına və kino sənayesinin davamlı inkişafına yönəlib.

Qaydaların əsas məqsədləri Azərbaycanda istehsal olunan filmlər üzrə çəkilmiş xərclərin müəyyən hissəsinin geri qaytarılması mexanizmini tənzimləmək, xarici prodüserlərin ölkəmizdə film istehsalına marağını artırmaq və beynəlxalq əməkdaşlıqları stimullaşdırmaq, kinematoqrafiya sahəsində şəffaf, səmərəli və əlçatan dəstək mexanizmi formalaşdırmaq, yerli istehsalçıların rəqabətqabiliyyətini və texniki potensialını gücləndirməkdən ibarətdir.

Qaydalara əsasən, geri ödəniş yalnız müəyyən edilmiş meyarlara uyğun gələn və auditdən keçmiş layihələrə şamil ediləcək. Mexanizm şəffaflıq, effektivlik və beynəlxalq təcrübəyə uyğunluq prinsipləri əsasında həyata keçiriləcək.

Bu təşəbbüs Azərbaycanın kino sənayesinə dövlət dəstəyinin institusional əsasda qurulmasına və ölkəmizin regional audiovizual mərkəzə çevrilməsi istiqamətində atılmış mühüm addımlardan biri olmaqla yanaşı, Azərbaycanın təbii çəkiliş məkanlarının dünyaya təqdim olunması üçün də nadir bir imkandır.

• "Susuz yaz"ın ssenari müəllifi və rejissoru açıqlandı
• Taun epidemiyası fonunda şəhvətli hekayələr - "Dekameron" haqqında maraqlı faktlar
• Aclıq aksiyası niyə dünyanın ən təhlükəli etiraz forması sayılır? - Tarixin ən qorxulu müqaviməti