"Ağır çəkili ziyalımız deyir ki, rus dili olmasaydı, mən adam olmayacaqdım. Anlamır ki, rus dili onu millət ola bilməsin deyə adam edib".

Kulis.az xəbər verir ki, bu sözləri yazıçı Aqşin Yenisey öz feysbuk profilində yazıb.

Onun dediyinə görə, rus dilinə tanınan imtiyazlar erməni dilinə tanınsaydı, bu gün rus dili ilə qürur duyanlar erməni dili ilə qürur duyacaqdı:

"Belə çıxır ki, ana dilimizdə adam olmaq mümkün deyil. Ona görə mümkün deyil ki, ana dilinin vətəndaş qarşısında daşımalı olduğu bütün intellektual öhdəliklər düşünülmüş şəkildə rus dilinin üzərinə qoyulub. Eyni intellektual öhdəliklər erməni dilinin də üzərinə qoyulub bizə təqdim olunsaydı, o ziyalı indi onu adam etdiyinə görə erməni diliylə qürur duyacaqdı".

Aqşin Yenisey hesab edir ki, çarə rusdilli məktəbləri bağlamaqdır:

"Nə qədər ki, Azərbaycanda rusdilli məktəblər olacaq, Azərbaycan dili zənginləşməyəcək! Ölü olmasa da, ölüvay bir dil olaraq qalacaq. Çünki millət yox, adam olmaq istəyənlər rus dilinin yaratdığı milli tənbəllikdən faydalanacaqlar. Eynən cəmiyyət qurmaq zəhmətinə qatlanmaqdansa, hazır qurulmuş cəmiyyətlərə köçüb faydalanmaq istəyənlərimiz kimi".

"Azərbaycan dilinin məişət dili səviyyəsində, folklorik məzmunda ilişib qalmasının səbəbi rus dilinə yaradılan ideoloji şəraitdir".

Onun dediyinə görə, rus dilini müdafiə edənlər çoxu yaşı 60-ı ötənlərdir:

"Rus dili" kərənayını çalan adamların çoxu yaşı 60-ı ötənlərdir. Həyatda qazandıqları hər şeyə görə bu dilə borcludurlar. Bu dildə Azərbaycanın nələr itirdiyi onları maraqlandırmır. Başa düşüləndir. Çünki bu dil azərbaycanlılara elə buna görə öyrədilib; şəxsi mənafeyini təmin etsin, milli mənafeyini unutsun. Azərbaycan dilinin məişət dili səviyyəsində, folklorik məzmunda ilişib qalmasının səbəbi rus dilinə yaradılan ideoloji şəraitdir".

Qeyd edək ki, Ayaz Salayevin Baku TV-də rus dili ilə bağlı səsləndirdiyi fikirlər birmənalı qarşılanmayıb. Onun sözlərinə görə, Azərbaycan dili üçün ən böyük təhlükə rus dili yox, türk dilidir.

• Fransa hökuməti ilə media qurumu arasında gərginlik - Səbəb
• Ramiz Əzizbəylinin kürəkəni külli miqdarda dələduzluq ittihamı ilə həbs olundu
• Kristian Munqunun yeni filmi Norveç və Rumıniyada ciddi mübahisələr doğurdu