Azərbaycanda Milli Musiqi Günü münasibətilə sentyabrın 18-də Ankaradakı Qazi Universitetinin Memar Kəmaləddin adına konsert sarayında Üzeyir Hacıbəyli” adlı tədbir keçirilib.

Kulis.az xəbər verir ki, tədbir Türkiyədəki Azərbaycan Mədəniyyət Mərkəzinin təşkilatçılığı, Qazi Universiteti, Ankara Musiqi və İncəsənət Universitetinin dəstəyi ilə təşkil edilib.

Tədbiri açan Azərbaycanın Əməkdar artisti İslam Manafov Üzeyir Hacıbəylinin sənət irsindən danışıb. O, Üzeyir Hacıbəylinin 1908-ci ildə 22 yaşında olarkən yazdığı “Leyli və Məcnun” operası ilə dünya mədəniyyətinə töhfə verdiyini, dahi bəstəkarın həm də vətənpərvər pedaqoq olduğunu vurğulayıb, onu Türk dünyasının görkəmli şəxsiyyətlərindən biri kimi səciyyələndirib.

Üzeyir Hacıbəylinin yaradıcılıq irsinin günümüzdə də Azərbaycan musiqi sənətinə işıq tutduğunu deyən Əməkdar artist tədbiri təşkil edən Azərbaycan Mədəniyyət Mərkəzinə minnətdarlığını bildirib.

Görkəmli bəstəkara həsr olunmuş filmin nümayişi ilə davam edən tədbirdə Azərbaycan Mədəniyyət Mərkəzinin layihəsi əsasında türk dilində hazırlanmış “Azərbaycanlı bəstəkarlardan fortepiano əsərləri” adlı kitabın təqdimatı və Türkiyədə yaşayan azərbaycanlı sənətçilərin iştirakı ilə dahi Üzeyir Hacıbəylinin əsərləri əsasında konsert proqramı təqdim edilib.

Nəşrdə dahi bəstəkar Üzeyir Hacıbəylinin yaradıcılığı, musiqi sənətinə verdiyi töhfələrə dair geniş məlumat verilib.

Tədbir çərçivəsində keçirilən konsert proqramında Ankara Opera və Baletinin mütəxəssisi, fortepianoçu Nailə Əhmədova, Azərbaycanın Əməkdar artisti İslam Manafov, opera sənətçiləri Ömer Türkmenoğlu, Ali Tuna Güney, Fidan Hüseynova Üzeyir Hacıbəylinin əsərlərindən parçalar səsləndiriblər.

Qeyd edək ki, Azərbaycan Mədəniyyət Mərkəzinin “Zəngəzur” rəqs ansamblı Üzeyir Hacıbəylinin repertuarından rəqslərlə çıxış ediblər.

• "Ölüm bizim imkanlarımızın həddidir..." - Martin Haydeggerdən aforizmlər
• Anarın ən müəmmalı əsəri - “Əlaqə”də gizlənən fəlsəfə
• Erməni müstəntiqə sərt cavab verən cümhuriyyətçi - O, niyə azad edilməsinə razı olmamışdı?