Kulis.az Araz Aslanlının torpaqlarımızın işğaldan azad olunma xəbərini verəndə diqqət etməli olduğumuz vacib məqamlarla bağlı yazısını təqdim edir.

20 ildən çoxdur ki, münaqişə terminologiyası ilə bağlı müraciətlərimiz olur. Hazırkı məqamda isə bu xüsusi önəm daşıyır. Ona görə də xahiş edirəm ki, xüsusilə KİV nümayəndələri, sosial şəbəkədə xüsusi fəal olanlar bu məsələdə daha diqqətli olsunlar:

1. Azərbaycan ordusu Xankəndini, Şuşanı ya da başqa bir ərazimizi vurmur. Azərbaycan ordusu işğalçı Ermənistan ordusunun Xankəndində, Şuşada və digər ərazilərimizdəki mövqelərinə zərbə endirir.

2. Ordumuz əraziləri tutmur ya da almır. Azad edir! Çox açıq ifadədir. Ermənistan ordusu tərəfindən işğal edilmiş ərazilər - Azərbaycan ordusu tərəfindən azad edilmiş ərazilər.

3. Azərbaycan ordusunun hədəfi işğalçı Ermənistan ordusudur. Mülki vətəndaşlar deyil. Bu mənada hədəf kimi "ermənilər" ifadəsindən istifadə edilməməsi daha məsləhətdir ("ermənilər qoyub qaçdılar" və s.). İstifadə olunacaq ifadə "Ermənistan ordusunun əsgərləri, zabitləri" və s. dir. Orudumuzun hədəfi millət deyil, işğalçı ordudur. İfadələr də buna uyğun olmalıdır.

4. Azərbaycan ərazisində "Dağlıq Qarabağ" adlı yer yoxdur. Keçmiş "Dağlıq Qarabağ Muxtar Vilayəti" var idi. İndi isə ayrı-ayrı rayonlar və Xankəndi var.

5. Azərbaycan öz ərazilərini azad edir. Apardığı əməliyyatın əsas məqsədi BMT TŞ-nin qətnamələrinin icrasıdır. Müəyyən motivləriylə Ermənistan işğalına qarşı zəruri müdafiə hüququndan istifadədir. Yekun məqsəd Ermənistanın beynəlxalq hüquqa uyğun ədalətli sülhə məcbur edilməsidir. İstifadə olunan ifadələr daha çox buna uyğun olsa daha yaxşı olar. "Separatizmlə mübarizə", "partizan müharibəsi", "terrorla mübarizə" indiki halda çox uyğun olmayan ifadələrdir (hər birinə aid nəsə detal tapmaq olar, amma bizi mahiyyətdən uzaqlaşdırar).

6. Şəhidlərimizin rayon və kəndlər üzrə siyahısının paylaşılması doğru olmaya bilər. Onlar Azərbaycanımızın uğrunda, bizi rayon, kənd yerliçiliyindən uzaqlaşdırmaq üçün şəhid olublar. "Filan rayon, filan kənd şəhidin var" şüarı ilə paylaşmamaq daha yaxşı olar. Bəziləri (şükür ki, sayıları çox azdır) "niyə filan yerdən şəhid azdır, filan yerdən çoxdur" tərzində söhbətlərə və başqa bəzi iyrənc təbliğatlara başlamaq istəyirlər. Qətiyyən imkan vermək olmaz. Hal-hazırda ən böyük gücümüz birliyimizdir. Bu cür iyrənc provakasiyalarla birliyimizin pozulmasına imkan verməməliyik.

• Həmişəlik - necə də uzun bir sözdür! - Georq Büxnerin sitatları
• "Həqiqi dahini bu əlamətdən tanıya bilərsiniz..." - Conatan Svift
• Tarixi Zəfərin uğurlu ekran təcəssümü: 5 il ərzində çəkilən “44” bədii filminin premyerası oldu