Bu gün “525-ci qəzet”in baş redaktoru, AYB-nin gənclər üzrə katibi Rəşad Məcidin 55 yaşı tamam olur. Kulis.az Rəşad müəllimi təbrik edir və onunla bağlı maraqlı faktları oxuculara çatdırır.
***
Rəşad Məcid Laçın rayonunun Ağoğlan kəndində, ana babasının evində dünyaya göz açıb. Doğulandan 10 gün sonra Ağcabədiyə, ata-baba evinə gətirilir. Daha sonra atasının işi ilə bağlı Ağdama köçürlər. 8 il də Ağdamda təhsil alır. Əslində isə onun atası da Laçınlıdır. Laçının Seyidlər kəndindən.
***
Ağdamda keçən uşaqlıq illərini belə xatırlayır: “Yaşadığımız məhəlləyə “Hamam məhəlləsi” deyirdilər. Orda yaşayan uşaqlar avara, dəcəl, xətalı idilər. İt saxlayanı kim, quş uçurdanı kim, qumar oynayanı kim. Bir gün mən də onlara qoşuldum. Avara uşaqlardan ayırmaq üçün məni Laçına göndərdilər. O vaxt Ağdamda pambıq vaxtı dərs olmurdu, şagirdləri pambığa aparırdılar. Amma Laçın dağ rayonu idi deyə dərslər dayanmırdı.”
***
Rəşad Məcid uşaqlıdan şeir yazırdı. Arzulayırdı ki, Yazıçılar Birliyində işləsin, qəzet redaktoru olsun. Zaman keçir, vaxt gəlib yetişir, Rəşad Məcid AYB-nin katibi və “525-ci qəzet”in baş redaktoru olur.
***
Bir gün atası onu Hüseyn Arifin yanına aparır. Şair Rəşadın şeirlərini oxuyur, bəyənir və uğurlu yol yazır. Şeirləri “Azərbaycan gəncləri” qəzetində çap edir.
***
Rəşad müəllimin atası Müseyib kişi Qarabağın hörmətli adamlarından olub. O, uzun müddət müxtəlif rayonlarda o vaxt “Raypo” deyilən məşhur qurumun (mağazalara mal paylayan idarə - red.) müdiri işləyib.
***
İstedadlı ədəbiyyat adamlarına, həmçinin gənc yazarlara kömək edib, dəstəyini əsirgəməyib. Rəşad Məcid seyid nəslindəndir. Deyir, bəlkə məndə bağışlamaq xüsusiyyəti gendən gəlir.
***
Bir müddət universitetdə müəllim də işləyib. Tələbələr ilk dərs günündə onu çox əsəbiləşdiriblər. Dərsin sonunda müəllim deyir ki, gizli şəkildə onun haqqında fikirlər qeyd etsinlər. Qeydlərdə belə yazırlar: “Qalstukunuzun rəngi ilə köynəyinizin rəngi uyğun gəlmir, ayaqqabınız xoşa gələn deyil, kostyumunuz uyğun deyil...”
***
Müsahibələrinin birində demişdi: “Torpaqlarımız işğal olunandan sonra 15 il şeir yazmamışam. Düşünmüşəm ki, Ağdam, Şuşa gedəndən sonra şeir, ədəbiyyat da bitib. Hətta həyatın mənasızlığını dərk edib quyuya düşmüşəm.”
***
Rəşad Məcid Ramiz Rövşənin ən məşhur şeirlərindən olan “Qara paltarlı qadın”ı toylarda ilk səsləndirən o olub. Şeiri oxuduqdan sonra toy camaatı hönkürtü ilə ağlayıb. Ramiz Rövşən də toyda bu şeirin oxunmasına qarşı imiş.
***
Jurnalist karyerasına korrekturalıqdan başlayıb. İlk müsahibəsini Flora Kərimova ilə edib. Onda 25 yaşı olan Rəşad üçün Flora xanım əlçatmaz idi. Amma görüş baş tutur. Səs yazısı diktofona köçürülür. Müsahibəni hazır edəndən sonra Flora xanıma zəng edir ki, görüşək, müsahibəni sizə də oxuyum. Flora Kərimova telefonda səsini eşidib təlaşla “Mən də elə bildim KQB-dən gəlmişdiniz, səsimi yazıb itdiniz” deyir. Müsahibəni oxuyur. Az keçmir Flora xanım soruşur ki, dəsmalın var? Hönkürür və ağlamağa başlayır.
***
İndi də bir az zarafatyana faktlar. Bir gün Park-Bulvarda kitab təqdimatı imiş, Seymur Baycanla görüşən Rəşad Məcid ondan ərklə soruşur:
- Seymur, niyə belə arıqlamısan?
Seymur heç kimin gözləmədiyi tərzdə onun üzünə qayıdır və cavabı hamı kimi Rəşad Məcidi də çaşdırır:
- Arıqlayaram da, hər şeyi basıb yeyirsiniz, bizə heç nə qalmır!
***
Seymur Baycanın “525-ci qəzet”də sərt tənqid elədiyi bir xanım redaksiyaya hücum edir. Məsələ çox böyüyür və günlərlə uzanır. Rəşad Məcid bir müddət Seymurun yazılarını verə bilmir. Lakin bunu Seymura deməyə ürəyi gəlmir. Axı o, qəzetdən qonorar alırdı. Çox düşünəndən sonra çıxış yolunu tapır və Seymura deyir:
“Sənə yazmamaq üçün qonorar ödəyəcəyik! Bir müddət buralara gəlmə.”
***
Rəşad Məcid AYB-yə katib gələndən sonra, bu təşkilat alternativ düşüncəli gənclərlə ilk dəfə eyni masa arxasında oturdu, fikir mübadiləsi apardı. Ona qədər gənclər katibi heç mətbuata açıqlama da vermir, varlığı ilə yoxluğu hiss olunmurdu.
***
Onun gənclər üzrə katib işlədiyi dövrdə ən çox müzakirəyə səbəb olan fikri bu olmuşdu: “Bizə istedadlı yox, sədaqətli gənclər lazımdır.”
