Kulis.Az #bumənimhekayəm müsabiqəsində üçüncü yerin sahibi Hüseyn Bağırovla müsahibəni təqdim edir.
- Hüseyn, təbrik edirik. Üçüncü yer oldun. Təəssüratlarını bölüşərdin.
- Çox gözəl hissdir. Sadəcə sevindim.
- Nə vaxtdan yazırsan? Bir neçə hekayən çap olunub deyəsən.
- Üç ildir yazıram. Amma son bir ildir dövri mətbuatda dərc olunuram. Bəli, bir neçə esse və hekayələrim dərc olunub.
- Müsabiqənin nəticələrindən razı qaldın?
- Saxtakarlıqla like toplayanlar müsabiqədən uzaqlaşdırılandan sonra çox razı qaldım.
- Sənin hekayənin zəif olduğunu deyirdilər. İradlara münasibətin necədir?
- Düz deyirlər. Bir az zəif idi. Çünki o hekayəni tez-tələsik metroda yazıb göndərdim. Amma səmimi hekayə idi. Olmuş hadisədən yazanda səmimi görünür. Bir az zəif yazmağımla uduzmuşamsa, səmimi olmağımla qazanmışam.
- Müsabiqənin laykla keçirilməsindən razı qaldın?
- Buna bir qədər tənqidi yanaşacam. Ədəbiyyat like sayı ilə ölçülməli deyil. Kulis ölkənin ən tanınmış ədəbiyyat portalıdır. Kulisin belə şeylərə getməsi bir az düzgün deyil.
- Müsabiqədə səni narahat edən hansı məqamlar
vardı?
- Bəli, hətta yazmışdım ki, saxta like toplayanlara görə müsabiqədən imtina edəcəm. Amma artıq onlar uzaqlaşdırılandan sonra məsələ çözüldü və məni narahat edəcək heç bir səbəb qalmadı.
- Hansı hekayələrin üçlükdə yer almağını istəyərdin?
- İnsanlar layiq bildiyi hekayələri seçiblər yəqin. Bir söz deyə bilmərəm.
- Çap olunan digər hekayələrdən hansıları bəyəndin? Hansı ki onlar az layk toplamışdı...
- Çinarə Ömrayın, Çinarə Böyükçölün hekayələri əla idi. Deyəsən, Çinarələr ədəbiyyat üçün yaranırlar.
