Kulis.Az Elnaz Eyvazın yeni şeirlərini təqdim edir

***

Həyat daha dərinmiş,
bildiyim dəryalardan.
boğuluram.
Əllərin saman çöpüdür...

***

Bir az fərqli ola bilərdi
tale, qədər, yazı.
Çox demirəm ki...
azı
iki kəlməlik fərq.
Elə gözəl olardı
həyat onda.
Məsələn,
üstünü mən örtərdim
gecələr oyananda...

***

Yaman uzanıb gecələr,
gündüzlər darıxdırır.
Havadan nəm tökülür
adamı karıxdırır.
Hər yerdə sənin ətrin,
tutub məni, buraxmır,
məndən nə xoşu gəlir?!
Mümkünse, bu aralar
yanımda ol...

Təklikdən
ölüm qoxusu gəlir...

***

Bir vaxtlarım vardı -
laçın vaxtlarım:
ürəyim arzularla dolu,
gözlərim ümidlə gülürdü,
hamıya özüm kimi inanardım.
Hamısını adamlar öldürdü...

***

Adını dua kimi
zikr edirəm yatınca,
Öpürəm xəyalını
qara, xırda gözümlə.
Deyirəm ki, həyatdır:
yataram, ayılmaram.
Sən qalarsan,
adını
qoy aparım özümlə...

***

Qoynuna girdiyin torpaqdır
indi sevgilin.
Aranıza girməyə nə həddim.
Səni
bircə ona qısqanmadım,
xoşbəxt olun,
Şəhidim!

***

Nə yaman çaparaq gəlmisən, Adam?!
ağ atın üstündən yıxaram Səni.
Çıxarıb köynəkdən, qollarım üstə
saz kimi sinəmə sıxaram Səni.

Çəkərəm qoxunu ciyərlərimə,
havana oynayar ruhum bədəndə.
Fəryadım içimdən çıxmır, hər dəfə
əlini əlimdən üzüb gedəndə.

Gedirsən, ürəyim pərdə-pərdədir,
nurunu apardın, gözə nə qaldı?
Sən bir də dolanıb gələnə kimi,
simsiz qol üstündə təzə nə qaldı.

***

Hamıdan gizlinimsən,
Sən mənimsən, mən yadın.
Dayan, tərpənmə, getmə,
Anam da yoxdu, Qadın.

Dur, başımı çiyninə
qoyub bir az uyuyam.
Kimsə bilmədi məni,
mən bir dərin quyuyam.

Susduqca dinlə barı,
gör necə səsim gəlir.
Hamıdan köçüb gələm,
Səndə öləsim gəlir...

***

İncimə e, ömrüm-günüm,
kimə edim gileyimi,
kimə deyim sözümü
Səndən ötrü darıxanda,
küsəndə?
Necə dözüm?
bir ürəkdir,
o da Səndə...

***

neynəyim, taleyin işi...
haçansa yadın olmuşam.
Özümü çatdırdım Sənə,
al qoynuna, sıx köksünə,
mən Səndə Qadın olmuşam...

***

Qocalarsan, gözlərin
görməz uzaq-yaxını.
Görməli olduğunun
görməzsən bir çoxunu,
keçərəm gözlərimdən
görən gözün olaram...
Səsləndiyin uzağa.
titrəyər, çatmaz səsin.
Harda olsam, gələrəm,
təki gəlsin nəfəsin.
Yaddaşımın küncünə
kəlmə-kəlmə köçürüb
yaşadaram özümdə.
Bu dünyanın heç nəyi
yoxdu Sənsiz gözümdə.
Ölərəm, "bəs" demərəm
görsəm hər gün, hər səhər,
yüz il Səni gündə mən.
Haqq Səndədir, Tanrıya
qovuşmuşam Səndə mən..

• "Sustalı Ceylan"la bağlı dəyişiklik
• Mədəniyyət tribunası - Kulis 14 yaşında
• Türkiyəli aktrisa serialdan qovuldu - Səbəb