Kulis.az Səhər Əhmədin yeni şeirlərini təqdim edir.
Zülümdü bu həyatın çaldığıyla oynamaq,
Bu fələyin üzünə ağ olmaq da çətindi.
Dərələrin gözündə dağtək uca görünən
Təpələrin içində dağ olmaq da çətindi.
Adsız yüksəkliklərdən atəşə tutuluruq,
Hər gün bir intiharla uçrumdan atılırıq,
Havalar qeyri-sabit, durumlar orta-ağır,
Susub oturmaq olmur, bağırmaq da çətindi.
Oyundankənar idik, bu dəfə də qol deyil,
Çıxaq meydandan daha, biz girəsi kol deyil,
Bu tilsimdən çıxmağa heç ölüm də yol deyil,
Amma neyniyək, doktor, sağalmaq da çətindi...
***
Mən axı buğa bürcüyəm,
Sən də qırmızı geymişdin.
Ya bir günah iş tutmuşdun,
Ya bir yalan söz demişdin.
Cəzan vardı, oğlum, cəzan,
Tanrı mənə göndərmişdi...
Qayğına elə qaldım ki,
Canını elə aldım ki,
Elə sevib ayrıldım ki,
Bütün sevib ayrıldığın qadınların
qanını elə aldım ki...
Mən axı buğa bürcüyəm,
Sənsə qırmızı geymişdin...
Bizi Telegram-da izləyin
t.me/kulis_az
Bizi Instagram-da izləyin
Bizi Facebook-da izləyin
Bizi Twitter-da izləyin
