Mehman Qaraxanoğlunun şeirləri
Sual
Nə edim
Özün de
Susursan
Mən evli kişi
Sən ərsiz qadın
Mən dörd göz
İyirmi metrlik evimi
Arxamca dartıram
Sən də ərsizliyini
Bəlkə bir şey oxuyaq
Santimetrlər haqda
Bəlkə bir şey oxuyaq
Ərli qadınlar haqda
Bax mahnılar bunun üçündü
Susursan
2014
Quyu
Ey qadın
Sən əyilərkən
Açıq yaxandan
İki kasa su tökülür sanki
Ey
Qıpqırmızı alma
Alov dilimləritək
Aralanmış dodaqların
Yerdən
Göydən
Su çəkir sanki
Yer üzündə nə qədər quyu var
Onların başında
Sən dayanmısan
Sən
Sən
Sən
Və
Yenə də sən
Ey qadın
2014
Eşidirsən
Eşidirsən
Qış öz yatağından
Buraxmır yazı
Sevişirlər
Evimizin köhnə damında
Uşaqlar deyir
Yaza çıxmaz damımız
Bu qədim cırıltıdı
İlk dəfə harada eşitdiyimi unutmuşam
Ölülər ağır olanda
Mafənin cırıltısı da belə olur
Bu əski küləklər
Donu əynindən çıxarılmış
Qadınlar kimidi
Onlar
Sərsəri küçələrdə
Özlərinə paltar seçirlər
Eşidirsən
Eşidirsən
2014
Bizi Telegram-da izləyin
t.me/kulis_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
Ana səhifə
Reels
Yazarlar
Xəbərlər