Kulisin “Blitz müsahibə” layihəsində suallara Elçin Hüseynbəyli cavab verir.

- Azərbaycan ədəbiyyatının ən mühüm nəsr əsəri sizcə hansıdır və niyə?

- Ədəbiyyatımızda vacib saydığım əsərlər çoxdur və onun başında Mirzə Cəlilin “Danabaş kəndinin əhvalatları” və “Danabaş kəndinin məktəbi” dayanır. Başqalarını sadalamaq istəmirəm, çünki çatdıra bilmərəm.

- Özünüzü hansı milli və xarici yazıçının davamçısı sayırsınız?

- Özümü konkret olaraq heç kimin davamçısı saymıram, amma təsirləndiyim və bəhrələndiyim yazıçılar bunlardır: Mirzə Cəlil, Andrey Platonov, Selencer. Son zamanlar isə Şalom Əleyxumun “Südçü Tevye” povesti.

- Ölkəmizdə ədəbiyyata olan münasibət sizi narahat edirmi?

- Narahat edir. Çünki oxucular getdikcə azalır. Özü də yazıçının hüquqlarını qoruyan hüquqi sənədlər azdır, bəlkə də yoxdur. Mən son zamanlar inkişaf edən internet ədəbiyyatını nəzərdə tuturam. Əsərlərdən hamı bəhrələnir, yazıçıdan başqa. Mən, əsasən məsələnin maddi tərəfini nəzərdə tutram.

- Sizcə Azərbaycan yazıçıları dünyaya çıxmaq üçün nə etməlidir?

- Bu dəfələrlə deyilmiş və müzakirə olunmuş məsələdir. Bununçün ilkin maliyyə lazımdır. Ən yaxşı ədəbi nümunələrimiz dövlət səviyyəsində tərcümə edilib yayımlanmalı və onun ardıcıl piarı aparlmalıdır. Bu sahədə müəyyən cəhdlər var, amma bu, sistematik deyil.

- İnternetin kütləviləşməsi ədəbiyyata necə təsir edir?

- Şedəbiyyat, yaxud sosial şəbəkə ədəbiyyatı, insan təfəkkürünün inkişafına təsir edir, amma örnəklər yaddan çıxır. Əsl ədəbiyyat kiməsə ömürlük təsir edən, yadda qalan ədəbiyyatdır. Sosial şəbəkə ədəbiyyatı sabun köpüyünə bənzəyir. Orada ağıllı və məntiqli fikirlər olsa da təsirsizdir və dəli adamın tez yaddan çıxan maraqlı nitqinə oxşayır.

Bizdə populyarlıq çox nadir hallarda maddi gəlir gətirir. Bayaq dediyim kimi, oxuyanların sayı onsuz da sıfır nöqtəsinə yaxınlaşır.

• Cətin oxunan, eyni zamanda unudulmaz poeziyanın yaradıcısı - Boleslav Lesmian
• Rüstəm Behrudinin yeni kitabı təqdim olunacaq
• Məşhur türk müğənni vəfat etdi