Kulis.az “Hekayə müzakirəsi” layihəsindən El Romanın "Pomada" hekayəsi haqqında ədəbiyyat adamlarının fikirlərini təqdim edir.

Alpay Azər:

"Hekayənin ideyası (insanın bəzən ona xırda görünə bilən bir şeyi bilmək istəyi, bu istəyin onu daima narahat etməsi) böyük olmasa da, maraqlıdır. Amma müəllif, məncə, bunu bədii müstəvidə həll edə bilməyib. Yəni pomadanın dadını bilmək insanı o cür hala, dəli vəziyyətinə gətirə bilməz və buna görə Sabirin tində dayanan üç oğlana pomadanın dadıyla bağlı verdiyi sual, əvəzində yumruq yeməsi detalı mənə inandırıcı gəlmədi. Eləcə də psixoloqla bağlı olan detal da hekayəyə nəsə vermir. Müəllifə uğurlar".

Sevinc Elsevər:

"Maraqla oxudum, axıcı sadə hekayə idi. Gözlənilməz sonluqlu hekayələri xoşlayıram. Bu da o cür hekayə idi. 8 mart ərəfəsi də yerinə düşən hekayədir. "Qadınlar nə istəyir?" - kişilərin əbədi-əzəli sualı qoyulur hekayədə. Yaxın dostun "başqa bir adam çıxmağı" barədə ayrı hekayədə də oxumuşdum. Süjet o hekayədəkindən fərqlidir amma".

Təvəkkül Boysunar:

"Yəqin, müəllif gəncdir deyə, mətn, hadisələr, obrazların həyatı, təlaşı, həyəcanı, mətndəki situasiya və konflikt çox süni alınıb. Amma iş orasındadır ki, müəllif bu gəncliyə rəğmən və ya bu gənclik sayəsində gözəl və qüsursuz şeirlər də yaza bilir. El Roman ədəbi mühitdə həqiqi şairlik istedadına malik gənclərdən biridir və sevərək oxuduğum gözəl şeirləri var. Ancaq bu mətn mənə süni və uğursuz görsəndi. Buna baxmayaraq onu bir məqama görə təbrik etmək olar ki, ən azından Sovet ədəbiyyatının təsirində deyil və nə vaxtsa təzə, gözəl nəsr nümunələri yarada bilər. Uğur arzulayıram".

Rəvan Cavid:

"Hadisələr öz bədii həllini tapmadan sürətlə dəyişir. Elə bil, yuxu görürsən. Ancaq bunun üslub olmadığını da rahatlıqla başa düşürsən. Elromanın təsvirləri də köhnədir. Müəllifdən oxuduğum ilk hekayədir. Bəlkə də, bu uğursuz hekayəni onun təcrübəsizliyinin ayağına yazmaq olar. Düşünürəm ki, davam etsə, hekayə ilə demək istədiklərini daha aydın oxucuya çatdıracaq. Əks halda, kal bir hekayədənsə, dəymiş şeir daha dadlı olar".

• Zümrüd Qasımova: "Anamın etmədiyini sən mənə etdin"
• Adel karyerasına fasilə verir
• “Geri dönüş” filmi üzərində işlər yekunlaşmaq üzrədir