Füzuli macar dilində

Ədəbi tənqid

Ana səhifə
Ədəbi tənqid

Füzuli macar dilində

9 iyun 2011

20:30

Əsəri professor İmre Adorian tərcümə edib

Azərbaycan Respublikasının Macarıstandakı səfirliyinin təşəbbüsü və yardımı ilə dahi Azərbaycan şairi Məhəmməd Füzulinin “Hədiqətüş – şühəda” əsəri Macarıstan Elmlər Akademiyasının “Akaprint Kiado” nəşriyyatında nəfis şəkildə nəşr olunub.

Səfirliyin mətbuat xidmətindən Lent.az-a verilən məlumata görə, macar dilində “İslamın müqəddəs şəhidlərinin bağçası” adı ilə işıq üzü görən əsəri orijinaldan tanınmış türkoloq-alim, professor İmre Adorian çevirib.

Macar alimi eyni zamanda kitaba ön söz və şərhlər də yazıb. O, Füzulinin zəngin irsindən məhz “Həditəqüş – şühəda” əsərinə müraciətini bu poemanın yüksək bədii məziyyətləri və humanist qayəsi ilə əsaslandırıb. Tərcüməçinin fikrincə, Füzuli islam müqəddəslərinin həyatına onların din uğrunda mübarizəsindən daha çox insani dəyərlərə böyük önəm verdiklərinə görə üz tutub və bu mənada orta əsrlər Avropa humanistlərinin bir çoxunu qabaqlayıb.

Azərbaycan Milli Elmlər Akademiyasının Nizami adına Ədəbiyyat İnstitutunun elmi işlər üzrə direktor müavini Teymur Kərimli kitaba Füzuli yaradıcılığının ümumbəşəri mahiyyətindən bəhs edən müqəddimə yazıb. Yaxın günlərdə Macarıstan Elmlər Akademiyasında Füzulinin macar nəşrinin təqdimat mərasiminin keçirilməsi planlaşdırılır.