Mayın 23-də Kann festivalının əsas müsabiqələrindən olan "Qısa metr" proqramına daxil olan "Sonuncu" bədii filminin nümayişi olub. Ümumilikdə doqquz filmin daxil olduğu "Qısa metr" müsabiqə proqramının beş filmi bu gün nümayiş etdirilib və Azərbaycan filmi sonda - beşinci film olaraq tamaşaçılara təqdim olunub.

Nümayişdən sonra filmlərin rejissorları səhnəyə dəvət olunub, dünya şöhrətli İran kinorejissoru Abbas Kiarostami başda olmaqla münsiflər heyəti tamaşaçılara təqdim edilib.

Festivalda iştirak edən rus kino tənqidçiləri də filmi maraqla qarşılayıb: “Proqramda Rusiya və Azərbaycanın müştərək filmi olan “Sonuncu” da var. Onun quruluşçu rejissoru Sergey Pikalov “Mımra” və “Gözəl doğulmaqdansa” telefilmləri ilə məşhurdur, “Sonuncu” onun kino debütüdür. Tənha qoca boş bir evdə, hamı tərəfindən unudulub və qızdırma içində son günlərini yaşayır. Ona uzaq qonşusu çörək və süd gətirib. Televiziyada sonuncu müharibə veteranının öldüyü barədə növbəti xəbər verirlər- qocanın stolunda isə əskiyə bükülü halda döyüş ordenləri var. Oo heç kimə lazım deyil, yeni xəbər verilənə qədər heç kim onunla maraqlanmayacaq. Bu susqun obrazda azərbaycanlı aktyor İdris Rüstəmovun oyunu mükəmməldir. İran rejissoru Abbas Kiorostaminin rəhbərlik etdiyi münsiflərin qərarı hələ qabaqdadır. Amma 3450 filmin içindən seçilməklə 9 filmdən biri olmaq artıq ciddi uğur deməkdir” . Bu fikirləri Rusiaynın məşhur kino tənqidçisi Valeriy Kiçin festival haqqında yazısında yazıb.

Qeyd edək ki, "Sonuncu" filminin rejissoru Sergey Pikalov, ssenari müəllifləri Sergey Pikalov və Aleksandr Krasavin, prodüserləri Mariya İvanova, Nəsib Piriyev və Müşfiq Hətəmovdur. Filmdə İdris Rüstəmov və Corc Qafarov çəkiliblər.

Xatırladaq ki, müsabiqənin nəticələri isə mayın 24-də festivalın bağlanış mərasimində məlum olacaq.

• “Emmi” mükafatı rekordlarla yadda qaldı
• Küçə xuliqanı, həbsdən qaçan agent, yorğun biznesmen... - Jan-Pol Belmondonun 5 məşhur rolu
• Sərdar Ortaç zərərli vərdişləri tərgitdiyini açıqladı