news-inner
clock08:30 calendar-gray 29 Dekabr 2013 view-gray4239 dəfə oxunub
view-gray4239 dəfə oxunub

Bir-birini sevməkdən qorxan iki adamın hekayəsi QAN TURALI YAZIR

Kulis.Az Qan Turalının “Çexovun romanı” hekayəsini təqdim edir.

- Təzə nə yazırsan?

- Yaxşı bir ideyam var, onu yazmaq istəyirəm.

- Nədi o elə?

- Bir hekayədi. Bir-birini sevməkdən qorxan iki adamın hekayəsi.

- Niyə qorxurlar bir-birini sevməkdən.

- Bilmirəm. Yazanda görəcəm.

- Maraqlıdır. Səncə maraqlıdı bu?

- Twitterdə dünən yazdım.

- Hekayəni?

- Yox, eləcə bir cümlə yazdım: “Bir-birini sevməkdən qorxan iki adamın hekayəsi”. 8 adam fav elədi...

- Twitterə qalsa hekayələr 140 işarə olar. Artıq olmaz.

- Hə, məncə bu ideya yaxşıdı. Amma əlimdə yaxşı bir material var. Onu yazmaq istəyirəm.

- Doğrudan? Nə materialı elə?

- Üç səhifədən ibarət bir yazışmadı.

- Kimindi?

- Bilmirəm. Dünən Çexovun romanını almışdım bukinistdən. Onun arasında tapdım. Bu fikir çoxdan ağlıma gəlmişdi. Orda bu yazışmanı tapdım.

- Üstündədi? Oxu, görüm...

- Eşq sənə çox yaxın olub, amma toxuna bilmədiyin şeydir. Toxunmağa qorxduğun şeydir. Qaçdığın amma qaça bilmədiyin şeydir. Qaçıb sonra da qarşılaşdığın şeydir.

- Bəzən isə görə bilmədiyin...

- Dayan e, indi nəyi kim deyir, qarışdı lap. Yaxşısı budur, oğlanı tünd qara hərflərlə verək, qızı isə adi.

- Yox, belə edək. Məndə iki nüsxədi. Oğlanı sən oxu, qızı mən.

- Olar, amma yenə də biz tünd hərflərlə verək ki, oxucu da başa düşsün, qarışmasın.

- Yaxşı. Oğlan tünd, qız da adi...

- Harda qalmışdıq?

- Başdan başlayaq da.

-------------------------------------------------------------------

- Eşq sənə çox yaxın olub, amma toxuna bilmədiyin şeydir. Toxunmağa qorxduğun şeydir. Qaçdığın amma qaça bilmədiyin şeydir. Qaçıb sonra da qarşılaşdığın şeydir.

- Bəzən isə görə bilmədiyin...

- Başqalarından ona danışmaqdır. İnkar edərcəsinə...

- Bəzən susmaqdır. İnkar edərcəsinə...

- Bəzən eləcə susmaqdır. Bəzən isə saatlarla danışmaq... Bəzən də günlərlə susmaqdır...

- Bəzən yuxuda onu görüb oyanmaq istəməməkdir. İnsan yuxuda da sevir... Nə qəribədir...

- Bəzən unudaram deyə ümidlənib bir axşamüstü qəfildən xatırlamaq və anda dözülməz ağrı duymaqdı...

- Bəzən yox, hər zaman ağrımaqdı...

- Bəzən yazışmaqdan xoşbəxt olmaq...

- Bəzən isə bir sətir də yaza bilməməkdir...

- Bəzən şəklinə baxmağa ürək eləməməkdir...

- Bəzən hərflərin gülüşünü adında görməkdir. Elə gözəl sıralanıblar ki, sanki əlifba onlardan ibarətdir.

- “Sənin adın hərflərin beşidir; Dodağımın bircə tərpənişidir”

- Gözəlmiş...

- Bizi elə bu gözəl havalar məhv etmədimi?

- Gözəl havalar yox, bəlkə sənin tutqun havaların məhv elədi...

- Bəzən 7 şəkli qarşına qoyub bir jürili, tək gözəlli gözəllik müsabiqəsi düzəltməkdir.

- Bəzən bir rəsmə gözlərini qırpmadan baxmaq, bir gün unudaram qorxusu ilə hər cizgini əzbərləməkdir. Amma bəzən şəkil iki ilin şəkli olur. Bəlkə dəyişibsə...

- Bəzən şəkillərdəki paltarlarını mağaza vitrinlərində axtarmaqdır...

- Bəzən də sevginin sənə ayan olmasından qorxub qaçırsan, qaçırsan... İstəmirsən...

- Bəzən qarşılıqlı inkarlarla hər ikisini rahatlaşdırmaq istəyidir... Amma bir gün o hiss ürəyində inqilab edib, taxta çıxar və sənin ürəyini cırmaqlayar... Ondan sarı çox narahat olarsan.

- Bəzən çox narahat olarsan, amma narahat etməzsən...

- Bəlkə o da narahat olar...

- Bəlkə deyil? Və bir sual var beynimdə dolaşan... Sən bilmək istəmədin, yoxsa mən demədim?

- Bu gecənin şeiri nədi, səncə?

- Bəzi gecələr zaman yavaşlayır. Bu gecələrdə insan yüzlərlə pis xatirə içindən canını ən çox incidəni seçir, şüaraltı zibilliyindən. Bu gecələrdə zaman keçməyi unudur. İnsan özünün incitmək istəyir o keçməyən zamanda. Saatlar boyunca daha dərinə, dibə getmək, bir növ ağrıdan həzz almaq. İllərlə əzizlənən, indi isə küçə iti olmağı bacarmayan qaçış ağrısıyla orda bura tullanıb dayanır.

Bu gecələrdə zaman ilişib dayanır. Bəzi mahnılar məhz həmin gecə dinlənmək üçün durur “play list”imizdə. Bəzi şeirlər ancaq həmin anlarda oxunulanda anlaşılır.

Bəzi gecələr zaman buz baltası kimi iti, soyuq və şəffafdır. Gözəgörünməz bir əl onu ruhumuzun ən həssas yerinə batırır.

-------------------------------------------------------------------

- Hə, burda qurtardı. Məncə hekayə yaxşı alınacaq. İstəyirəm bu yazışmanı homoseksual olduğunu gizlədən oğlanla qız haqda yazım. Oğlan qıza homoseksual olduğunu demək istəmir, qız da bilmir. Qız da elə bilir ki, oğlanın başqa dərdi var. Ona görə də belə vəziyyət alınır.

- Sən ömründə homoseksualla 5 dəqiqə söhbət eləmisən heç?

- Yox...

- Bəs onda göydən nə yazacaqsan?

-Onda başqa şey tapım. Dünən bunu Çexovun romanının arasından tapanda gördüm ki, əsl ədəbiyyat materialıdır. Whats App yazışmasıdır, print eləmişdilər. Dedim ki...

- Bir dəqiqə... Çexovun romanından? Axı Çexovun romanı yoxdur...

news-inner-user
Qan Turalı

228 məqalə

Oxşar xəbərlər

Xəbər lenti

Xalça şərqisi – Rafiq Tağının hekayəsi
21:01 05 Avqust 2021
Mirzə Cəlilin nəvəsi Fransadakı səfirliyimizdə olub
18:54 05 Avqust 2021
Qəbələ Musiqi Festivalı başa çatdı
18:14 05 Avqust 2021
Yaxınları Rafiq Tağını ziyarət etdi - Foto
18:07 05 Avqust 2021
Tanınmış yazıçı ilə görüş keçiriləcək
17:30 05 Avqust 2021
Axına qarşı üzmədən nəyəsə nail olmaq qeyri-mümkündür
17:01 05 Avqust 2021
Azərbaycanda etdiyi bu rəqsə görə Rafet El Romanı topa tutdular - Video
16:14 05 Avqust 2021
Rafiq Tağının qardaşı: “Anam qətlə yetirildiyini bilmirdi, ona qurban demişdi” – Müsahibə
15:21 05 Avqust 2021
Yaponiyada alovlanan olimpiya məşəli və Türkiyədəki meşə yanğınları
14:43 05 Avqust 2021
Nobelli şair məhkəməni uddu
14:01 05 Avqust 2021
"Çocuklar duymasın"ın Havuçu yanğınsöndürənlərə qoşuldu - Fotolar
13:12 05 Avqust 2021
Başı kəsilən Sevinci necə xilas edə bilərdik?
12:26 05 Avqust 2021
Əri evə başqa qadın gətirdi, efirə çıxarmaq üçün ona əxlaqsız təkliflər etdilər, iki uşağıyla ac-susuz qaldı – Səfil həyatı yaşayan xanəndəmiz
12:02 05 Avqust 2021
Flora Kərimovanı hədəfə alanların əsl siması – Sevda yazır...
11:01 05 Avqust 2021
Azərbaycanda yeni musiqi aləti yaradıldı - Foto
10:31 05 Avqust 2021
44 müəllifdən 44 ən yaxşı hekayə - Yeni layihə
10:01 05 Avqust 2021
Kosmik raketlərdən bəhs edən peyğəmbər hədisi – Zamin yazır...
09:00 05 Avqust 2021
Xalq artisti Rafiq Hüseynovun film kimi həyatı - Maraqlı faktlar
21:00 04 Avqust 2021
Amerikalı vokalçının “Qarabağ Azərbaycandır” klipinin təqdimatı keçirilib
18:45 04 Avqust 2021
Yanğın “Rəcəb İvedik”in evinə yaxınlaşdı – Qalmaqal düşdü
18:01 04 Avqust 2021