Təzə söhbət var: dünyaca məşhur aktyor, Hollivud ulduzu Jan-Klod Van Dammın oğlu azərbaycanlı xanımla ailə qurub.

Atası kimi aktyor olan Kristofer Van Barenberq (Kris Van Damm) pianoçu Suada Hacızadə ilə nikah bağlayıb.

Xəbər yayılan kimi bekarçılıqdan əziyyət çəkən azərbaycanlıların əlinə yaxşıca fürsət keçdi: hamı bu mövzunu çək-çevir etməyə, yumor hissinin gücünü sınamağa başladı.

Yavaş-yavaş Van Dammın azərbaycanlı qudaları da göründü, arxasınca Van Dammın gəlini ilə rəqsi sosial şəbəkələrdə ildırım sürətilə yayıldı.

Amerikalı Van Damm da "Quda" mahnısı altında qol qaldırıb oynamaq xoşbəxtliyinə qovuşdu.

Hələ bu harasıdır?

Qohumların öpüş yağışı, oğlunun hər bayram qız evinə əli dolu getməsi var. Yazıq Van Damm, hələ başına nələrin gələcəyini bilmir. Azərbaycanlı gəlini oğluna almaq asan məsələ deyil. Gərək bizim mentalitetə, milli-mənəvi dəyərlərə öyrəşəsən, heç olmasa "salam-sağ ol", "qaqa, bunun aşağı yeri yoxdu" səviyyəsində söhbətlərə alışmaq vaxtıdır.

Hələ toy gecəsi Van Damm gəlininin şərəfinə "şpaqat" açıb dünyaya mesaj göndərməsə inciyərik ondan.

Bizim xaricilərə aşırı sevgimiz də ayrı bir bəladır.

Xaricidirsə, deməli, hər şey qaydasındadır.

Xaricidirsə, mədənidir, sivildir, humanistdir və s. və i.a.

Bu müstəvidə sosial şəbəkə əhli Van Dammı yaş yuyub quru sərdilər. Dedilər, bizim oğlanlar dura-dura Van Dammın oğlu kimdir?

Nə olsun atası karate ustasıdır, dünya ulduzudur?

Nə olsun onun o məşhur filmlərini uşaqlığımız kimi unuda bilmirik?

Bu yadelli sevgisi hardandır bizdə?

Hər halda o da bir insandır.

Xalqımız bu səpkidə tənqidləri ilə xeyli ürəklərini boşaldıb rahatladılar. Yaxşı ki, Van Dammın teması ortaya çıxdı, yoxsa xalqımız həmişəki kimi darıxmaq epidemiyasından əziyyət çəkəcəkdi.

Neyləyək, işimiz-gücümüz yoxdur, gözləyirik ki, hansı məşhur azərbaycanlıyla evlənəcək, biz də vaxtımızı keçirəcəyik.

Eşitdiyimə görə, Van Dammı indi gəlinin qohumları əhatəyə alıb, hələ bir qohum "qabaqlar mən də vurduğumu yıxırdım" deyir, kişinin filmlərdəki döyüş səhnələrinin doğru olub-olmadığını soruşurlar.

Van Damm da əsnəyə-əsnəyə (dəqiq məlumatdır) yolaverdi danışırmış. Bu məqam qohumların xoşuna getməyib, qıza deyiblər, qayınatan adamayovuşmazmdır, sözü-söhbəti yoxdur, ona başa sal, denən, ayıbdı, camaatın yanında özünü dağın başına qoymasın.

Qız da qohumlara baxıb-baxıb başını bulayıb və ingilis dilində susub.

• Döyüş romantikasını darmadağın edən faktlar - Ölmədən öncə mütləq baxılmalı 10 müharibə filmi
• Gecə - Varlam Şalamovun hekayəsi
• Polina Qaqarina AB sanksiyalarının ləğvi üçün ikinci bir iddia qaldırdı