Bu gün Ağdaban faciəsindən 29 il ötür.

Kulis.az-ın verdiyi xəbərə görə, 1992-ci il aprelin 7-dən 8-nə keçən gecə ermənilər tərəfindən törədilən soyqırımı zamanı Kəlbəcər rayonunun 130 evdən ibarət Ağdaban kəndi tamamilə yandırılıb və yer üzündən silinib.

Kəndin 779 nəfər dinc sakininə qeyri-insani işgəncələr verilib, 33 nəfər qətlə yetirilib, 8 nəfər 90 -100 yaşlı qoca, 2 azyaşlı uşaq, 7 qadın diri-diri yandırılıb.

Ermənilərin Azərbaycanın mədəni irsinə qarşı törətdikləri vandalizm siyasətinin davamının daha bir təzahürü kimi şair Ağdabanlı Qurbanın və klassik aşıq şeirinin ustadlarından olan Dədə Şəmşirin əlyazmaları məhv edilib.

Dədə Şəmşirin məzarı dağıdılıb və faciə zamanı aşığın ocağına məxsus 16 nəfər öldürülüb.

Bu barədə paylaşım edən millət vəkili Jalə Əliyeva yazır:

“Həmin gecə ustad aşıq, böyük sənətkar Dədə Şəmşir ocağının 16 üzvü acımasızca qətlə yetirildi.

Dədə Şəmşirin evi yağmalandı, gülləbaran edildi, əlyazmaları, bütün külliyatı göyə sovruldu…

Azərbaycanın müasir tarixində, ədəbiyyatında görkəmli izi və yeri olan bu nəslin şəcərəsi, sələfləri və xələfləri haqqında hazırlamaqda olduğum monoqrafiya üçün lazımlı məlumatları toplayarkən Dədə Şəmşir yurdunun çırağını yandıran, el ağsaqqalı Qənbər Şəmşiroğlunun şəxsən şahidi olduğu bu hadisələri öz dilindən eşidib, onun bu hadisələri hətta nəql edərkən belə hansı sarsıntıları keçirtdiyini görmək çox çətin oldu…

Amma, eyni zamanda yaşı artıq 80-i ötmüş, dünyanın hər şirinini-acısını dadmış aqil bir insanın böyük kədərinin – Yurd həsrətinin kövrək simləri arxasında dayanan güclü inamı və qırılmaz ümidi sezmək də inanılmaz bir xoş ovqat verirdi insana!

Dövlət başçısının dönməz iradəsinə inam!

Ağdabanı bir daha görəcəyinə ümid!

Onu dinlədikcə ürəyimdən arzular keçirdi…

Allah Sizə uzun ömür versin!

Allah dövlətimizi və Prezidentimizi qorusun!

Biz də inanırıq ki, yolumuzu gözləyən doğma Qarabağımızda zəfər marşımız əzəmətlə çalınacaq, itirdiyimiz bütün torpaqlarda üçrəngli bayrağımız qürurla dalğalanacaqdır!

Allah bütün şəhidlərimizə rəhmət etsin!”

• Türk dünyasının yaddaşını yazıya çevirən adam - Bir ziyalının portreti
• Dünya kinosunun "Anna Karenina"sı - Qreta Qarbonun məşhur rolları
• Əri “xalq düşməni” elan edildi, Cəfər Cabbarlı çadrasını açdı – İzzət Orucovanın ağır taleyi