Oktyabrın 2-də Milli İncəsənət Muzeyində Mədəniyyət Nazirliyinin “Ordumuz üçün yarat” layihəsinin təqdimatı və “Evdə Qal Evdə Yarat” müsabiqəsinin mükafatlandırma mərasimi keçirilib.

Kulis.az xəbər verir ki, tədbirdə Mədəniyyət nazirinin birinci müavini, Mədəniyyət nazirinin vəzifələrini müvəqqəti icra edən Anar Kərimov cəbhədə gedən döyüşlərə münasibətini bildirib.

Qeyd edib ki, Ermənistanın Azərbaycana qarşı hərbi təcavüzü nəticəsində işğal edilmiş ərazilərdə yerləşən yaşayış evləri, təhsil, sənaye və kənd təsərrüfatı obyektləri ilə yanaşı, yüzlərlə mədəniyyət müəssisəsi, o cümlədən Qarabağ münaqişəsinə qədər dövlət qeydiyyatına alınan 700-dən artıq tarix və mədəniyyət abidəsi erməni vandalizminin qurbanına çevrilib.

Azərbaycan xalqı müstəqillik tarixinin çox mühüm, taleyüklü, eyni zamanda şanlı, qalibiyyət soraqlı günlərini yaşayır. Sentyabrın 27-də Ermənistan silahlı qüvvələrinin cəbhə xətti zonasında yerləşən Azərbaycan Ordusunun mövqelərini və yaşayış məntəqələrimizi növbəti dəfə intensiv atəşə tutmasına və təcavüzkar əməllərini davam etdirməsinə cavab olaraq Silahlı Qüvvələrimiz Ali Baş Komandanın əmri ilə düşmənə qarşı indiyədək misli görünməmiş əks hücum əməliyyatına başlayıb. Müzəffər Ordumuz bütün cəbhə boyu işğalçı qüvvələrə sarsıdıcı zərbələr endirərək Vətən torpağını azad etməyə davam edir.

Bildirib ki, müstəqil dövlətimizin suverenliyi və ölkəmizin ərazi bütövlüyü üçün tarixi əhəmiyyət kəsb edən bu günlərdə Mədəniyyət Nazirliyi müzəffər Ordumuza dəstək olaraq, cəmiyyətdə vətənpərvərlik ruhunun daha da yüksəldilməsi, əsgər və zabitlərimizin döyüş meydanında yazdığı tarixin bədii yaddaşda, sənət əsərlərində yaşadılması, həmçinin illərdir işğal altında qalan, dağıdılıb talan edilən tarixi-mədəni irsimizi bir daha dünyaya tanıdılması məqsədilə silsilə layihələrin icrasına başlayıb.

Həyata keçiriləcək daha bir layihə “Ordumuz üçün yarat” aksiyasıdır deyən Anar Kəromov deyib ki, layihəyə qoşulacaq hər bir iştirakçı özünün əl işi, təsviri və dekorativ tətbiqi sənət əsərləri, digər nümunələrlə müzəffər Ordumuza sənət dəstəyini, eyni zamanda qabiliyyət və təxəyyülünü ifadə edə bilər. Layihə çərçivəsində ərsəyə gələcək əl işləri torpaqlarımızın bütövlüyünü qoruyan hərbçilərimizə ərməğan ediləcəkdir.

Sonra Anar Kərimov bu ilin mart ayında Nazirlik və “Kreativ Azərbaycan” portalı tərəfindən elan olunan “Evdə Qal Evdə Yarat” müsabiqəsindən söz açıb. Diqqətə çatdırıb ki, qısa zaman ərzində bu müsabiqəyə Azərbaycanda yerləşən bir sıra dövlət qurumları, qeyri hökumət təşkilatları dəstək olub. Müsabiqənin əsas şərti koronavirus infeksiyasının yayıldığı müddətdə vətəndaşlar tərəfindən evdə qalaraq yaradılan əl işləri, rəsm və musiqi əsərləri, dizayn, video, yazılı mətn, foto, yaradıcı texnologiya və s. kimi yaradıcılıq məhsullarının #evdəqalevdəyarat həştəqindən istifadə edərək öz səhifələrində paylaşmaqları idi.

Qeyd edilib ki, portalın “Facebook” və “Instagram” səhifələri üzərindən ölkəmizin regionları da daxil olmaqla 4500-dən artıq istifadəçi yaratdıqları müxtəlif məhsullar, əl işləri, rəsm əsərləri, musiqi parçaları, həmçinin ifaçılıq və bədii qiraət nümunələri ilə öz sosial şəbəkə səhifələrində paylaşımlar etməklə bu təşəbbüsə qoşulublar.

Bildirilib ki, bir sıra dövlət qurumları, qeyri-hökumət təşkilatları, Milli Məclisin deputatları, tanınmış incəsənət xadimləri, həmçinin böyük nüfuza, sosial statusa malik şəxslər, həmçinin, “Söz” ədəbi layihəsi də təşəbbüsə dəstək göstəriblər. "Evdə Qal Evdə Yarat" müsabiqəsi ümumilikdə 70 mindən çox insanı əhatə edib.

Sonda "Evdə Qal Evdə Yarat" müsabiqəsinin iştirakçıları xüsusi diplom və pul mükafatı ilə təltif olunub./azertag.az/

• Məşhur müğənni 30 yaşında vəfat etdi
• Namiq Dəlidağlının Qırğızıstanda kitabı nəşr edildi
• Könlümə tək Kəbə yapdım səni mən - Almas İldırım