Gənclər və İdman Nazirliyinin dəstəyi ilə “Virtual Qarabağ” İnformasiya – Kommunikasiya Texnologiyaları Gənclər İctimai Birliyi tərəfindən istehsal olunmuş “Xocalı–bir millətin kədəri” sənədli filminin Azərbaycan dili versiyasının AzTV-də təqdimatı və nümayişi həyata keçiriləcək.

Kulis.az xəbər verir ki, bu barədə Gənclər və İdman Nazirliyi yanında Gənclərlə İş üzrə İctimai Şuranın sədri Nurəddin Mehdiyev filmin üç dildə - Azərbaycan, ingilis, rus dillərində istehsal olunduğunu, 2020–ci ilin sonunda isə daha iki dildə türk və fransız dillərində olacağını bildirib.

Avqustun 15-də nümayişi nəzərdə tutulan sənədli film 1988-1993–cü illərdə Azərbaycanın ayrılmaz tərkib hissəsi olan Dağlıq Qarabağın Ermənistan tərəfindən işğalı, bu zaman 1992-ci il fevralın 26-da Ermənistan ordusunun Xocalı şəhərində yerli əhaliyə qarşı törətdiyi vəhşilik və soyqırımı aktı, Xocalı soyqırımı haqqında həqiqətlərin gizlədilməsi istiqamətində Ermənistanın və onun müxtəlif dairələrinin fəaliyyətlərinin və erməni yalanlarının ifşa olunması haqqındadır. Xocalı soyqırımı haqqında həqiqətlərin və obyektiv məlumatların dünya ictimaiyyətinə, eləcə də gələcək nəsillərə çatdırmaq sənədli filmin əsas məqsədidir.

Filmin ssenarisi Birləşmiş Krallıqdan olan, uzun illər Azərbaycanda yaşayıb-yaratmış müstəqil jurnalist İan Piert tərəfindən şəxsi müşahidələr və araşdırmalar nəticəsində yazılıb.

Sənədli filmin əsas səciyyəvi xüsusiyyətlərindən biri Xocalı soyqırımına təkcə 1992–ci il fevralın 26-da baş vermiş faciə fonunda baxmamaq, soyqırıma qədərki tarixi dövrlərdə Azərbaycanda, Qarabağda və Xocalı şəhərində baş vermiş proseslərin təhlili, şəhərin qədim və yaxın keçmişdəki tarixinin tamaşaçıya təqdim olunması, orada keçmişdə ermənilər tərəfindən törədilən qırğınlar haqqında məlumatların verilməsi, niyə məhz Xocalının ermənilər tərəfindən hədəf alınması kimi sualların cavablandırılmasıdır.

Sənədli filmin əsas səciyyəvi xüsusiyyətlərindən digəri isə Xocalı ilə bağlı yeni orijinal videomaterialların filmin istehsalında istifadə olunmasıdır. Bu baxımdan “Xocalı–bir millətin kədəri” filmi Azərbaycanda Xocalının bütün tarixi dövrlərini və 1992-ci il 26 fevral soyqırımını orijinal çəkiliş materialları, video- arxiv materialları, arxiv sənədləri və muzey materialları ilə əks etdirən modern formatda hazırlanmış ilk ümumi, tarixi sənədli ekran əsəridir.

Filmin ideya müəllifi və direktoru Nurəddin Mehdiyev, ssenari müəllifi Birləşmiş Krallıqdan olan, uzun illər Azərbaycanda yaşayıb-yaratmış müstəqil araşdırmaçı jurnalist İan Piert, məsləhətçiləri Milli Məclisin deputatı Elman Məmmədov, tarix üzrə fəlsəfə doktoru Nazim Mustafa, tarixçi–alim Ramin Əlizadə və Natıq Alışov, quruluşçu rejissoru Teymur Nəcəfzadə, operatorları Pərviz Əliyev və Cahid Əliyevdir. Filmi Azərbaycan dilində Elşən Rüstəmov səsləndirib.

“Xocalı–bir millətin kədəri” sənədli filmi Gənclər və İdman Nazirliyinin maliyyə dəstəyi ilə istehsal olunub. /azertag.az/

• "İstanbul Saat Festivalı" keçirildi
• XIl Bakı Beynəlxalq kitab sərgisinin fəxri yazarları kimdir?
• "Qadınların əksəriyyəti qarşılarına çıxan ən pis "yanlış adam"la kifayətlənir..." - Elfrida Yelinekdən sitatlar