writer1

Cəlil Cavanşir

Məqalə sayı

294
clock11:18 calendar-gray 24 Mart 2019 view-gray15375 dəfə oxunub
view-gray15375 dəfə oxunub

Aydın Xırdalanlının vaxtsız ölümünün sirri

Cəlil Cavanşir

Sənətini şövqlə və eşqlə icra edən, gördüyü işin mahiyyətini anlayan, bacardıqca meyxananı bayağılaşdırmayan nadir meyxanaçılardan idi.

Qəfil qazandığı şöhrət, kasıb bir cavan oğlanın qəfildən xalqın sevimlisinə çevrilməsi, efirlərdə, el məclislərində digərlərindən fərqləndirilməsi, qazandığı pullar onu məhv elədi.

O başqaları kimi qazandıqlarını reklamına, efirlərə, bahalı geyimlərə, bahalı avtomobillərə xərcləmədi.

Məclislərdə yanında dolaşan, sözünün ağırlığı altında əzilənlər kimi duetlər yazdırmağa, şou-biznesin qalmaqallarına meyllənmədi.

İşbazlar meyxananı şou-biznes predmetinə çevirib böyük pullar qazandıqca, o özünü tükətməklə məşğul idi.

O qazandıqlarını özünü məhv etməyə xərclədi.

Onu digərlərindən məhz bu azadlığı, dəliliyi və dəliqanlılığı fərqləndirirdi.

Qəribə də olsa, onu məhz bu xüsusiyyətlərinə görə sevirdim.

Narkotik aludəçisi idi və yaşadığı həyatın yanlış olduğunun fərqində idi.

İçindəki ramolunmaz istedadın ağırlığı onu sıxırdı.

Dostları, onu sevənlər, dinləyiciləri onu bu yoldan çəkindirməyə çalışırdı.

Amma o, Aydın idi.

Başqalarına bənzəmirdi.

Dünyadan qaçmağın bir yolunu arayırdı.

***

Aydın Xırdalanlı 42 yaşında, qaraciyər serrozundan öldü.

Məclislərdə xırıltılı səsi ilə meydangirlik edib, rəqiblərinə aman verməyən Aydının son videoları, fotoları ürək dağlayır, insanı kədərə boğurdu.

Aydının çöküşü, şöhrət qazanmasından daha sürətli baş verdi.

Meyxana müsabiqəsində yazdığı “Ev tapşırıqları”, bədahətən dediyi meyxanalar, rəqiblərinə göz açmağa imkan vermədiyi deyişmələrlə xalqın ürəyinə yol tapmışdı.

El məclislərinin ən sevilən meyxana ustalarından idi.

Bir neçə dəfə şahidi olmuşdum, o məclisə girəndə məclis coşub, dalğalanırdı.

Onun coşqusu, meydanı ələ alıb məclisin məcrasını dəyişməsi başqa aləm idi.

***

Gündən-günə bayağılaşan, saxta dindarlıq və vətənpərvərlik pərdəsinə bürünən meyxana aləmində onun öz yeri vardı.

Qüsurları da vardı.

Bu yazıda o qüsurların üstündən keçəcəm.

Onu tənqid etməyə ürəyim əl vermir.

O, duruşu, təfəkkürü, həyat tərzi və dediyi meyxanalarla, hətta jestləri və mimikaları ilə əsl meyxanaçı idi.

Onun ən böyük üstünlüyü sünilikdən uzaq olması, bir də səmimi şəkildə özünü ifadə edib seçdiyi yolun nahamarlığını etiraf etməsi idi.

Azər Sani kimi din və qəzəl bilicisindən dərs almışdı.

Məhz şəxsi talantı və ustaddan aldığı dərs sayəsində dini ehkamları və qəzəliyyatı yaxşı bilirdi.

Onun ən çətin bəhrlərdə belə asanlıqla meydan qurmasının, rəqiblərini sıxışdırmasının bir neçə dəfə canlı şahidi olmuşam.

Dini məsələləri də kifayət qədər səlis ifadə etməyi, dini mövzuları ustalıqla nəzmə çəkməyi vardı.

İstəsə din pərdəsi altında gizlənə bilərdi, özünü dindar kimi sırıyıb min oyundan çıxa bilərdi.

Amma o səmimi idi, dindən uzaq düşdüyünü, yanlış yolda olduğunu təəssüflə vurğulayırdı.

Meyxanasevərlər onun məhz səmimiyyəti və istedadını yüksək qiymətləndirirdi.

Meyxananın anderqraund sənət olmasını dərk edən və sənətini düzgün şəkildə yaşadan nadir istedad sahibi idi Aydın.

Onun taleyi bir az da meyxananın taleyinə bənzəyir.

Nizami Rəmzinin, Kəbir Azərinin, Məşədibabanın, Bayramın taleyi kimi...

***

Onun həyatının son illəri kədərli əhvalatlarla doludur.

Səfil həyatı, məclislərdən uzaq düşməsi, getdiyi təsadüfi məclislərdə mikrofona həsrətlə baxması...

Dispanserdə çəkilmiş bir videosu yayılmışdı, baxdıqca qəhərdən boğulurdum.

Hansısa təriqət mənsubları narkotikin təsiri altında olan Aydına dini məsələdə hansısa səhvini etiraf etdirib, videoya çəkmişdilər.

Üzücü idi.

Bir də son videomüsahibələrindən birini xatırlayıram.

Təxminən qısa ömrün son etirafları, peşimanlıqları var o müsahibədə.

Bir də “Düşdüm” rədifli son qəzəli:

İslanmışa çox gəlmə hədə-qorxu yağışla

Məndən xəbər al, gör necə leysanlara düşdüm...

***

Onu tanımayanlara tanıtmağa çalışıram, amma kədərimi ifadə etməkdə acizəm.

İnsanın öz sənətini sevməsi normaldır.

O, öz sənətini anlayır, dərk edirdi.

Həyata, başına gələnlərə, hətta xəstəliyinə istehza ilə baxırdı.

Ölümün də üstünə o istehzasıyla getməyi bacardı.

***

O izdihamın, çoxluğun içində tənhalıq yaşayanlardan idi.

Gülə-gülə, Aydın!

Əbədi hüzurun, əbədi rahatlığın mübarək...

REKLAM

Yazarın digər yazıları

Xəbər lenti

"Yeddi oğul istərəm" filminə çəkildiyinə görə peşman olub ağlayan Xalq artisti - Maraqlı faktlar
21:00 22 İyun 2021
Bakı Musiqi Akademiyasının 100 illiyi qeyd edilib
19:30 22 İyun 2021
Şuşa ilə bağlı yeni qurum yaradıldı
18:47 22 İyun 2021
Dinlə, gör nə deyir bu dəli-dəli...
18:02 22 İyun 2021
Aqşin Yenisey: "Ədəbiyyatımız reanimasiya xəstəsidir" - Müsahibə
17:15 22 İyun 2021
Evində ölü tapılan Çingiz: bu gün dünyasını dəyişən rejissor kimdir?
16:26 22 İyun 2021
Türkiyə növbəti il "Avroviziya"da iştirak edəcəkmi?
15:44 22 İyun 2021
Xətai Akvarel Qalereyasından maraqlı tədbir
15:01 22 İyun 2021
Pandemiya harınlamışlara dərs oldu – Müğənnilər toy sevincini bölüşür
14:10 22 İyun 2021
Azərbaycanlı rejissor vəfat etdi
14:01 22 İyun 2021
Mədəniyyət Nazirliyində seçkilər keçiriləcək
13:19 22 İyun 2021
Sevdiyi qızın qrup yoldaşını döydü, həbsxanada şəkər xəstəliyi tapdı, oğlunun ölümünə görə gəlinini təbrik etdi - Xəlil Rzadan 10 qeyri-adi fakt
12:37 22 İyun 2021
Vandamın qudası niyə gündəm olur? - Mətbuatın sirri
12:01 22 İyun 2021
Sözümüzün Cahangiri - Müşfiq Şükürlü yazır
11:30 22 İyun 2021
Bir şairi öldürdülər – Günün Şeiri
11:00 22 İyun 2021
Anarın hekayəsi Monteneqronun populyar saytlarında
10:30 22 İyun 2021
Tanınmış şair vəfat etdi
09:56 22 İyun 2021
Azərbaycanlı yazıçıdan lezbiyan haqda hekayə: Mən səni həmişə sevəcəm
09:01 22 İyun 2021
Jan Pol Sartrın dahiyanə hekayəsi – Mətn
21:00 21 İyun 2021
Nizami Gəncəviyə həsr olunmuş beynəlxalq konqres keçiriləcək
18:56 21 İyun 2021