news-inner
clock11:03 calendar-gray 08 Mart 2019 view-gray4639 dəfə oxunub
view-gray4639 dəfə oxunub

Qadın da vətən kimidi... – 8 Mart Şeirləri

Kulis.az 8 Mart – Beynəlxalq Qadınlar Bayramı münasibəti ilə qadın şairlərimizin seçmə şeirlərini təqdim edir.

Səhər Əhməd

***

Xoşuma gələn geyimlər

yaşıma uyğun deyil.

Yaşıma uyğun olanlar

xoşuma gəlmir.

Ürəyimdən keçən günlər

başıma uyğun deyil.

Onunçün istədiklərim

başıma gəlmir.

Nə ola, alınan mallar

geri verilə.

Mən də qaytaram bu canı,

xoşuma gəlmir.

Cansız bir maneken olam,

heç dəyişməyən.

Baxam donuq bir vitrinin

boz şüşəsindən.

Sevinc Elsevər

Azad qadın heykəlinə

yağış tökür göydən

Cəlil Cavanşirin kitab təqdimatına tələsirəm

"Azad qadın” heykəlinin yanına çatanda

paltomun başlığını atıram kürəyimə ehtiramla

saçlarımı yağışa öpdürürəm

çadrasını başından biryolluq çıxartmış o qadın kimi

özümü gizləyərək

hətta yağışa, soyuğa qarşı da

bürünərək ötməyə ürəyim gəlmir

bu məğrur və şax dayanan qadının yanından.

Esmira Məhiqızı

***

ağlıma gəldi ki, mən mən deyiləm,

mən orda qalmışam, oralar məndə.

ömür də bölünüb ağa, qaraya,

ağlar uzaqlarda, qaralar məndə.

heç mənlik deyilmiş bu yol, bu yöntəm,

hər karvan dalınca ulayan itəm,

bir azca qürbətəm, bir azca vətən,

haralar varıymış, haralar məndə.

dərdə diz basmaqdan, dizlərim yara,

izimə düşürəm, izlərim yara,

ayağım, ürəyim, gözlərim yara,

yeriyir, yüyürür yaralar məndə.

Rəbiqə

***

Allah, mənə bir az bəxt ver,

bir az da vaxt, yaşayım.

Bir az ömrümdən yaşayım,

Bir az sərvaxt yaşayım.

Mənə gecələr yuxu,

Səhərlər gümrahlıq ver.

Mənə bir damcı qorxu,

Bir damcı toxtaqlıq ver.

Bir az ümiddən yolla,

Bir az işıq at, bəsdi.

Bir az ağıl ver, seçim

Nə bəsdi, nə əbəsdi.

Bir az mərhəmət göndər,

Bir də, bol-bol məhəbbət.

Bircə sənə yazmağa

Bir yerim olsun xəlvət.

Bir tikə çörək tapım,

Bir parç su, yaşayaram.

Bir də qızımı qoru,

Nə versən, daşıyaram.

Aysel Əlizadə

***

Məndən sonra doğulacaq qadın,

ruhumu vəsiyyət edirəm sənə.

Gələn bütün kişiləri,

şeirlərimi

bir də sevgimi vəsiyyət edirəm.

Sevilməyini istəyirəm...

Məni düşün bu şeiri oxurkən

bizi düşün.

Dünyanın ən xoşbəxti ol

ən bədbəxti də

mənim kimi...

Hərdən

qəlbini rahat burax

hərdən də günah işlət.

Səndən öncə bir şair qadın vardı

bir az məsum, bir az günahkardı.

Bir adi qadın vardı,

bir dəlisov qadın

bütün qadınlar o idi.

Coşqun yaşardı

sakit yaşardı

sevgiləri

ayrılıqları vardı

ən yaxşı kişiləri

ən pis qadınlara bağışlayardı.

Bir qadın vardı...

bir tərəfi həmişə sevgi qoxardı

bir tərəfi yalnızlıq olardı...

...sənə kədərimi vəsiyyət edirəm

bilirəm,

kədər yaraşacaq sənə

gözlərin havaya dikiləcək

havanın rəngsizliyində

daha kədərli görünəcək.

Sənə sevincimi vəsiyyət edirəm

bilirəm,

sevinc yaraşacaq sənə

gözəlləşəcəksən.

Sən gülüncə o xoşbəxt olacaq.

Sevincinlə kədərin dostlaşacaq

hər yerdə ikisi də

yanında olacaq

onlardan başqa kimsəyə güvənmə,

kimsəyə.

Unutma,

heç vaxt yerlər unutmayacaq səni

unutsa yollar unudacaq...

Məndən sonra doğulacaq qadın,

yerimi sənə verirəm

qadın olmağı bacarsan

səni şeirlərim ağladacaq

ruhuma kövrələcən

sükutumu istəyəcən

səs-küyümü də...

Heyif oturub üz-üzə

şərab içmədik səninlə,

dərdləşmədik,

heyif,

ondan danışmadıq.

Sevərsən.

Qorxmazsan, sevərsən onu

bu bir həyat qanunu

sadəcə sevərsən...

Çox görmə özünə bunu

bu acı deyil,

bir həyat düzənindir

sevməsən pozarsan

öpürəm səni.

Qoru özünü

özündən sonrakı qadın

üçün qoru...

Sevinc Çılğın

Üç görüşə

Bu gün sus

Heç nə demə

qırmızı paltar geyinəcəyəm

yerində olsaydım, düşünməzdim də.

Elə bax!

Necə olsa, səhərdir.

Sabah gülərsən

"vur bura” deyərsən arada

sarı paltar geyinəcəyəm

alaqaranlıqda.

O biri gün sevinərsən

elə bilərsən dünyanı sənə veriblər.

Sən nə desən,

istəsən...

sultansan da.

O gecənin yarısında

Yaşıl paltar geyinəcəyəm!

Fəridə Uğur

Bəyaz gecələr

Hardasan, ey Günəş,

gözüm yollarda qaldı.

Bu gecə öz sükutunu

uşaq qığıltısına

dəyişməyə hazırdı…

Son sözünü deyir sükut

bu açılan səhərə

bir azdan oyanacaq

ana narahatlığı

uşaq səsinə…

Elnaz Eyvaz

***

Payız buludu kimiyəm,

fəqət

hələ də yay ayaqqabısında gəzən

kimsəsiz uşaqdan utanıb

yağmıram

Narıngül Nadir

***

Qadın da vətən kimidi

Sevəni var,

Atanı var,

Satanı var,

Aldadıb

baş qatanı var.

Qadın da vətən kimidi

Əkəni var,

Biçəni var,

Köçəni var,

Tapdalayıb keçəni var.

Qadın da vətən kimidi

Bir tərəfi ölümdü-itimdi,

Yiyəsi olmasa yetimdi.

Bahar Zamanova

Qadın

Nədir əlindən gələn - ancaq göz yaşı silmək.

Gözlərində yaşamaq, ürəyi məzar Qadın.

Duyğuları musiqi, saçları kaman simi,

Öz dərdinə ən gözəl bəstələr yazan Qadın.

Nədir adın bilmirəm, yazmı, payızmı, qışmı?

Nədir üzündən axan - göz yaşımı, yağışmı?

Bu bəxt deyil, bu nalə, ağı, fəryad, qarğışmı?!

Özünə ağı deyib ağlayan ozan Qadın.

Əlləri torpaq qoxar, barmaqları dəstə gül,

Elə gülər ki, solar ağacda gül üstə gül.

Bütün güllərdən gözəl, amma bir az xəstə gül,

Buludların içindən torpağa sızan Qadın.

Gedib çoxdan o gedən, yuxusuna da gəlməz.

Darmadağın dünyası istəsə də düzəlməz.

Bir məzar var hardasa - nə danışmaz, nə dinməz,

Eləcə pıçıldayar: "Yanıma uzan, Qadın..."

Soyuyan əllərindən buzun xəbəri olmaz,

Elə qırılar düşər, tozun xəbəri olmaz,

Aç ürəyində yaşa, qızın... xəbəri olmaz.

Bütün ittihamlara lal olub susan Qadın.

Hamının gözlədiyi gözləməz heç kimsəni,

Nə geriyə qayıtmaz, nə qaytarmaz küsəni.

Nə qədər dedinsə də anlamadılar səni...

Dedilər, sən qadınsan, sən elə busan - qadın!

Nə yeri var, nə yurdu, eşitsən səsdi qadın

Şaxtadan, qardan soyuq, Günəşdən isti qadın.

Nəyə lazım qəfəslər? Elə qəfəsdi qadın...

Toy görüb yuxusunda ölümə yozan Qadın!

news-inner-user

18103 məqalə

Oxşar xəbərlər

Xəbər lenti

“Baku” jurnalı “Yandeks dzen” platformasında təqdim olunur
18:55 05 Mart 2021
Qadınlar Gününə həsr olunmuş sərgi keçiriləcək
18:01 05 Mart 2021
Qadına görə özünü yandıran məşhur meyxanaçı - Məşədibaba Elçini niyə öldürmüşdü? - Video
17:09 05 Mart 2021
“Oyaq gözəl” tamaşası onlayn nümayiş ediləcək
16:22 05 Mart 2021
Yanlış tanıdığımız Amerika – Cavid Ramazanov yazır
15:30 05 Mart 2021
Qodar kinodan gedir
14:40 05 Mart 2021
Türkiyəli yazıçı vəfat etdi
13:50 05 Mart 2021
Dahi şairin çap olunmamış şeiri tapıldı
13:01 05 Mart 2021
Ona qarşı “vnimatelni” olmadılar - Yaşar Nurinin fəxri ada həsrət qalan atası - Maraqlı faktlar
12:30 05 Mart 2021
Nənəsi şal örtən, qızı şort geyinən dostum – Şərif Ağayar yazır...
11:44 05 Mart 2021
Lal deyil, amma ömrü boyu danışmır...
11:01 05 Mart 2021
Berlin Film Festivalında Azərbaycan düzəlişi
10:14 05 Mart 2021
Erməni generalını boğan şəhid haqqında roman - İlk hissə
09:00 05 Mart 2021
Acından kirpikləri tökülən, evlənməkdən qorxan, mənzilində yiyəsiz ölən Əməkdar artist
21:00 04 Mart 2021
O, ölümə qaçdığının fərqində deyildi – Cavanşir Yusifli yazır…
18:11 04 Mart 2021
İsa peyğəmbər öldürülməyib: Bunu Quran da təsdiq edir
17:34 04 Mart 2021
Xalça Muzeyi fəaliyyətini dayandırır
16:47 04 Mart 2021
Milli Dram Teatrının mart repertuarı
16:08 04 Mart 2021
Tağıyevin gənc arvadının soyadını götürdü, Nağıyev evini əlindən aldı, bığını qırxdığı üçün nəsli ilə düşmən oldu - Ərəblinskini kim güllələyib?
15:02 04 Mart 2021
Cavanşir Məmmədovun çırtması, pampersli quzu
13:10 04 Mart 2021