news-inner
clock13:04 calendar-gray 14 Mart 2018 view-gray337 dəfə oxunub
view-gray337 dəfə oxunub

"Papağa pul qoyun" - Çərşənbə axşamından REPORTAJ

Aliyə

Oturmuşduq divanda,

TV-nin qabağında

Birdən qapı döyüldü,

Açdım gördüm çərşənbə!

Bu qədər papaq olarmı? Üstəlik şəkərbura, paxlava kimi bayram şirniyyatları da bişirməmişik. Üz verdik qoz fındığa, konfetə.

Bu papaqların bizə verdiyi bayram ovqatı bizim onların içinə tökdüklərimizdən çox oldu. O qədər həvəsləndik ki, papaqlara Allah verəndən töküb qalxdıq ayağa. Uşaqlar papaq atıbsa, deməli, bayram tonqalı da təşkil ediblər.

Həmin uşaqlardı, həyətdə daim danladığımız, “ay uşaq, qapının ağzında oynamayın”, “İtləri bura dadandırmayın” deyib ora-bura qovaladığımız... İndi tonqalı qalayıb, papaq atıb həyatın bayram olduğunu bizə sübut edirlər. Dərsini bilməyən uşaqlar kimi əvvəlcə pərt dursaq da (həyətdə bayram, biz evdə mürgüləyirik) yavaş-yavaş onların hay-küyünə qoşuluruq.

Bu gün 3-4 binanın bir tonqalı var. Amma çox böyük tonqalı. Hava soyuqdur, tonqal bizi maqnit kimi çəkir, o qədər yaxınlaşıram ki, qəfil alov üzümü qarsır. Uşaqlardan biri qayğıkeşliklə səslənir:

“İndi tullanmaq olmaz. Bir azdan hamımız tullanacağıq”.

Bu tonqal hamını beləcə mehriban, qayğıkeş edib. Məhəllə arvadları bayramlaşırlar:

- Ay, Bibsara, bayramuvuz mübarək...

- Siznən bahəm.

- Adə, ayaqqabuvu yandırma...

Yağış qara çevirib. Amma körpə uşaqlı bir-iki qadından başqa tonqaldan aralanan yoxdur. Uşaqlı-böyüklü hamı tonqalın dövrəsində səssizcə nəyisə gözləyir. Bu adamların çoxu odun üstündən atlanmayacaq, bilirəm. Sadəcə alov öz rəqsi ilə hamını ovsunlayıb. Daha doğrusu, bu cazibəni belə tez qırmaq mümkün deyil.

Arada uşaqlar tonqaldan bir kösöv oğurlayıb muxtar vilayət yaradır, kösövü sönən kimi yenidən tonqala qayıdırlar.

- Bayramınız mübarək!

- Sizin də.

- Daha papaq atmayacaqsız?

Ən dilavəri qabağa gəlir:

- Hamısına atmışıq!

- Necə hamısına? Bütün binalardakı mənzillərə?

- Bu binanın giriş qapıları kodladı. O iki binaya atmışıq. Mən bir manat qazandım!

- Adın nədi?

- İbrahim.

Bayaqdan yağışla odun mübarizəsində odun tərəfində dayanıb üfürən, kağız gətirən, canı dildən əlləşən oğlan axırda yorulub, söhbətimizə qoşulur:

- Sizin qapıya papaq atmışdıq. Yekə papaq mənim idi...

80-lərə aid “norka” papağı yadıma salıb soruşuram:

- Kimin papağıdı o?

- Elə belə götürmüşəm e, yekə kişi papağıdı. Mən heləsini qoymuram. Nənəm verdi. Köhnə papağdı.

- Yaxşı, uşaqlar, bəs hamı birdən niyə atırsız? Yəni bir-bir niyə atmırsız?

İbrahim qabağa gəlir:

- Birinciyə çox qoyullar, sonrakılara az qoyullar, ya da heç açmırlar qapını. Biz də hamısını birdən qoyuruq ki, bölüb hərəsinə eyni qədər töksünlər (Bax e... Dünyaya ədaləti gətirsə-gətirsə uşaqlar gətirəcək).

- Nə alanda sevinirsiz?

- Pul. Budey buna bir manat qoyublar.

- Neynirsiz ki, pulu?

- İqra oynamağa gedəcəm.

- Yaxşı uşaqlar, gedək tullanaq da tonqalda..

Uşaqlar həmrəyliyə sevinir:

- Siz də tullanacaqsız?

- Niyə tullanmıram?

Uşaqlar sevinə-sevinə məni dişi ilə dırnağı ilə yığıb qaladıqları tonqala tərəf aparırlar. Yolda söhbət edirik.

Bayaqdan adət etdikləri kimi müdafiə intonasiyasında danışan, istehkam mövqeyində dayanan uşaqlar indicə günün qəhrəmanı, hətta bayramın sahibi olduqlarını duyurlar.

Taxtaları nə zülmlə toplayıblar. Arabada lazımlı şeylər toplayanlar aparmasın deyə, bloklarına, hətta balkonlarına daşıyıblar. Taxta pəncərəni “JEK”in işçisinin əlindən güclə alıblar. Köhnə divanı sökəndə əlini əzənlər olub. Həm neçə gündür hava yağışlıdır deyə, girişdəki beton tavanın üstünə tulladıqları islanıb. Ayrıca öz binalarının qabağında yandırmaq üçün odunlarının yaramadığını, quru taxtaların az olduğunu görəndə qərara alıblar ki, o biri binanın uşaqları ilə danışığa getsinlər, necə deyərlər qüvvələri birləşdirsinlər. Olan quru taxtaları aparıb ümumi tonqala atıblar.

Məni tonqala qonaq aparan uşaqlara üzrxahlıq edirəm:

- Uşaqlar, gərək bağışlayasız. Papağınıza şəkərbura, paxlava qoya bilmədim. Hələ bişirə bilməmişik. Bayramda yenə papaq atarsız. Ona qədər bişirəcəyik.

“Ev sahibləri” ürək genişliyi ilə cavab verirlər:

- Narahat olmayın, eybi yoxdur...

İçlərindən ən maarifçi olanı yol göstərir:

- Şəkərbura olmayanda pul da qoya bilərsiz...

Pul ağlıma gəlməmişdi. Hardan gəlsin? 80-lərin uşaqlarıyıq.

Çərşənbə tonqalı bina sakinlərini yox, nəsilləri də bir yerə yığıb...

news-inner-user
Aliyə

999 məqalə

Oxşar xəbərlər

Xəbər lenti

Aşıq Veysəlin nəvəsi babası ilə bağlı məşhur faktları inkar etdi
15:59 28 Yanvar 2021
"İstəyirəm xanımların mənə yazığı gəlsin" - Vaqif Səmədoğlu ilə müsahibə
15:18 28 Yanvar 2021
Xalq artisti: "Şəfiqə Məmmədovadan hamı narazıdır"
14:40 28 Yanvar 2021
Eyvaz Əlləzoğlunun 65 yaşı tamam olur – Onu yaxından tanıyaq
14:36 28 Yanvar 2021
Nobel ziyafəti verilən salon peyvənd mərkəzinə çevrilir
14:22 28 Yanvar 2021
Aktrisa 94 yaşında vəfat etdi
13:41 28 Yanvar 2021
Vaqifin ortadan qırılan siqareti – Babək Göyüş yazır...
13:01 28 Yanvar 2021
Sevgilisi ilə xanımını 4 ay bir evdə saxladı, yəhudi toyunda hamını ayağa qalxmağa məcbur etdi- Heç kimə bənzəməyən Rəmiş
12:30 28 Yanvar 2021
Ürək parçalayan şəhid məzarları – Günahkar kimdi?
11:50 28 Yanvar 2021
Azərbaycanlının evlilik təklifi niyə bayağı alınır?
11:07 28 Yanvar 2021
Anar evliliyinin 59 illiyini qeyd etdi - Fotolar
10:25 28 Yanvar 2021
Kann Film Festivalı təxirə salındı
10:02 28 Yanvar 2021
Orxan Pamukun romanları Qərbin gizli sifarişidir – Aqşin Yenisey yazır...
09:01 28 Yanvar 2021
“Azərbaycanın klassik 12 instrumental muğamı” kitabı təqdim olundu
18:59 27 Yanvar 2021
Mədəniyyət naziri Fransanın dövlət katibi ilə görüşdü
18:11 27 Yanvar 2021
Qarabağda mina təmizləyənlərdən film çəkildi - Video
17:28 27 Yanvar 2021
Bizim keçmişimiz əl-ələ gəzir - Elvin Bakiroğlunun yeni şeirləri
16:46 27 Yanvar 2021
Di Kaprio ABŞ prezidentinə açıq məktub yazdı
16:01 27 Yanvar 2021
Fərhad Bədəlbəyli: “Bülbülün həyətinə girəndə qorxdum” – Şuşa söhbəti
15:18 27 Yanvar 2021
Çində "Nizami irsi" layihəsinə strat verildi
14:46 27 Yanvar 2021