Fevralın 6-da Muzey Mərkəzində rəssam Firəngiz Hüseynovanın “Qəlbin inciləri” adlı fərdi sərgisi açılıb.

Sərgi Mədəniyyət və Turizm Nazirliyi, Dövlət Rəsm Qalereyası və Muzey Mərkəzinin birgə təşkilatçılığı ilə gerçəkləşib.

Mərasimdə Xalq Rəssamı, Azərbaycan Dövlət Rəssamlıq Akademiyasının rektoru, akademik Ömər Eldarov Firəngiz Hüseynovanın əsərlərinin sənətkarlıq xüsusiyyətlərindən danışıb. Bildirib ki, rəssamın əsərlərində qırmızı rəng çalarları aparıcı rol oynayır. Onun bır sıra natürmortlarında isə narın üstünlüyü özünü aşkar göstərir. Ümumiyyətlə, natürmortlar Firəngiz Hüseynovanın yaradıcılığında xüsusi yer tutur. Rəssamın çoxşaxəli yaradıcı maraqlarının cəlbedici və parlaq istiqamətlərindən biri orta əsr Azərbaycan miniatür sənətidir. O, əlyazmalar üçün məşhur illüstrasiyalar əsasında qarışıq texnika vasitəsilə əsərlər yaradır.

Mədəniyyət və Turizm Nazirliyinin dekorativ və tətbiqi sənət sektorunun müdiri Qalib Qasımov, Azərbaycan Rəssamlar İttifaqının məsul katibi, Əməkdar İncəsənət Xadimi Rafiq Kərimov və başqaları sərginin əhəmiyyətindən danışıblar.

Bildirilib ki, sərgi əsasən tablolardan ibarət olsa da, burada ipək üzərində naxış işləmələri və qrafika da yer alıb. Bu, Firəngiz Hüseynovanın ikinci fərdi sərgisidir. Rəssam xarici ölkələrdə keçirilmiş bir sıra müştərək sərgilərin də iştirakçısı olub. Onun əsərləri Almaniya, Rusiya, ABŞ, İsrail, Çin, İspaniya və digər ölkələrdə fərdi kolleksiyalarda saxlanılır.

Diqqətə çatdırılıb ki, ixtisası həkim olan, məşhur akademik Çazovun tələbəsi Firəngiz Hüseynova əsrin dörddəbirini Respublika Diaqnostika Mərkəzi və Ailə Sağlamlıq Mərkəzində kardiodiaqnostika sahəsində çalışıb. “Hər bir insanın ürəyi fərdi, təkrarolunmaz, unikaldır”, - deyən Firəngiz Hüseynovanın yaradıcılığı da elə bu prinsipə söykənir.

Rəssamın yaradıcılığında, həmçinin qadın, gənc xanım və qız obrazları cəmlənib. Bu silsiləyə “Arzu”, “Səhranın atlısı”, “Gecə”, “Məktub”, “Aynanın qarşısında”, “Ana və uşaq”, “Gələcək balerina”, “Oyuncaqlı qız”, “Əkizlər” tabloları aiddir.

Tədbirdə Firəngiz Hüseynova çıxış edərək tədbirin təşkilatçılarına və iştirakçılarına təşəkkür edib.

Daha sonra qonaqlar sərgi ilə tanış olublar. Fevralın 11-dək davam edəcək sərgidə fırça ustasının müxtəlif janrlarda 100-dək əsəri nümayiş olunur.

Sərgi tamaşaçılar tərəfindən maraqla qarşılanıb.

• Həbsxana, yoxsa kurort?- Diddiyə xidmət edən məhkumlar, qaçaqmalçılıq və lüks həyat
• Afra Saraçoğlu sərbəst buraxıldı
• Məşhur alim ölümündən əvvəl dostuna nə demişdi? – İllər sonra açılan sirr