news-inner
clock11:32 calendar-gray 15 Yanvar 2018 view-gray143 dəfə oxunub
view-gray143 dəfə oxunub

Sənin “yaxşı olacaq” dediyin bu xəstəlik

Rəvan Cavid

Ümid haqqında Bakı

Bu şəhərin ümidi

Xoşbəxtliyindən çoxdu,

Hamının ümidi var,

Hamı xoşbəxt deyil ki.

Sən hər şeyi asan bil,

Vərəmdən ölən dostum dünən gecə deyir ki,

Cənnətin qapısının önü qəbiristan imiş.

Bu şəhərin gedəni qayıtmaq üçün yox,

Unutmamaq üçün bəhanələr axtarır,

Bir az da buna görə sevirəm bu şəhəri,

Sevgisi çox bayağı, nifrəti çox saxtadır!

Bu şəhərin qoxusu

Bir azca neft qoxuyur,

Bir az neftçi parfümü,

Bu şəhərin payızı

Bir az insan itkisi, bir az yarpaq tökümü.

Bu şəhərin ümidi

Xoşbəxtliyindən çoxdu,

Hamının ümidi var,

Hamı xoşbəxt deyil ki.

Yaxşı olacaq!

Balıqçıya küləklər ümidsizlik deməkdi,

Tilovunu balıq yox,

Dalğalar tərpədəndə.

Mən onda öyrənmişdim:

Yalançı balıq olur,

Yalançı ümid olmur.

Yalan-gerçək hər şeyə

Məcbur inanmalıyam, başa düşürsənmi, dost,

Məcbur inanmalıyam.

Limanların tanker yox,

Sərnişin gözləməsi,

Adamların sahildə balaca ümidləri

Hələ əzizləməsi -

Xoşbəxtlik imiş, dostum,

Məcbur inanmalıyam!

Sənin “yaxşı olacaq” dediyin bu xəstəlik

Ümidlə sağalırmış,

Hələ ki yaxşı ümid tapmamışam limanda,

Süni daş döşəməli o soyuq sahillərdə

Yenə gəmi yerinə tanker gəlir limana,

Yenə kimlərsə əksik Bakıda mənzillərdə.

“yaxşı olacaq”, hə, dostum,

Məcbur inanmalıyam,

Hər şey yaxşı olacaq!

Ulucay Akiflə söhbət.

Ayrılıq qanadlarının qırılması yox,

Uçduğun səmanı tərk etməkdi

Ulucay Akif

***

Ayrılıq - qanadların ola-ola

səmaya yerdən baxmaqdı!

***

Sevgi - bir qadın üçün yox,

o qadının

zümrüd boyunbağısı üçün darıxmaqdı!

***

Ümid - hər gün eyni yola çıxmaqdı!

***

Və şair olmaq - hədəflərinə yox,

havaya güllə çaxmaqdı!

***

Bir nə sadə, nə də mürəkkəbdi

- sadəcə... təkdi!

news-inner-user
Kulis+

619 məqalə

Paylaş

Oxşar xəbərlər