news-inner
clock12:36 calendar-gray 17 Avqust 2017 view-gray44 dəfə oxunub
view-gray44 dəfə oxunub

Biçildi ömrümüz qəm dəryazında – Yaralı Bəxtiyardan YENİ ŞEİRLƏR

Kulis.Az şair Yaralı Bəxtiyarın “Axarıncı şeirlər” adlı yeni şeirlərini təqdim edir.

1

Tanıdınmı gözüm nuru

Mənəm, yazıq gəlinəsi

Ağlar qalsın gülməyimi

Oldum gülünc, gülünəsi.

Gözün eli talayası

Canım oda qalayası

Dilim meydan sulayası

Sinən meydan bilinəsi.

Ömür necə qorunası

Qara gəldi qərinəsi

Odu, kəndin görünəsi

De kimlərə ləlinəsi?

Kim sözünü çeynəyəsi

Deyim fələk neynəyəsi

Sümükləri qaynayası

İlikləri ilinəsi.

Ta Bəxtiyar söz bəyidi

Yalan ömrün düz bəyidi

Qara gözlər özbəyidi

Durub səcdə qılınası.

2

Razı-razı güzgülənən ay gözəl

Gör nə var gözəllik dünyasında, bax

Dünyanı gözəllik xilas edən döy

Min cür qan-qada var xilasında, bax.

Hərə bu dünyada bir cür yol tutar

Yaman ayaq tutar, yaxşı əl tutar

Sağı sağ göstərər, solu sol tutar

Sən sənə qəlbimin aynasında bax.

Şairin düz sözü suçu deməkdi

Çox şirin nağıllar acı deməkdi

Həyat nə deməkdi, nəçi deməkdi

Mənim gözlərimin damlasında bax.

Yaralı Bəxtiyar deyər sinədən

Görüm qana düşsün könül qanadan

Bu dünya belədi başdan-binadan

Sən bu gözəlliyə sonrasında bax.

3

Yenilərsən vaxt-vədəyə

Höcətkarı yendirincə

Ağır sözlər yüngülləşər

Süysününə mindirincə.

Olmayası nədən olur?

Dolu döysə nə dən olur?

Adam özü nadan olur

Bir nadanı qandırınca.

Söz qiymətdə baha yaxşı

Ucuz sözlər şaha yaxşı

Dindirməsən daha yaxşı

Abırsızı dindirincə.

Der Bəxtiyar, sinəm təndir

Çıxmaz candan azar andır

Çayqarada zibil yandır

Axmağa can yandırınca.

4

TƏCNİS

Lənət xeyrinə xeyir güdənin

Baxmaram o pula, ya da vara mən.

Əlinə baxınca gədə-güdənin

Ya mala baxaram, ya davara mən.

Mərd vaxtsız gedərsə qəm dər yasında

Biçildi ömrümüz qəm dəryazında

Batsam kömək etməz qəm dəryasında

Bilsə ki, möhtacam yad, avara mən.

Bəxtiyar düz yolda varınca vara

İncəlik mal-mülkdü, var incə vara

Beş-on qanan adam var incəvara

Ollam nadan üçün yad, avara mən.

5

TƏCNİS

Kimin ürəyində təpər var bir az

Qalxan o yamacı, o diki odu.

Sevgilər də oddu, qəzəblər də od

Söndürür gör neçə od iki odu.

Gərək getməyəsən dada nadana

Ondansa bağına dadana dana

Hər kim versə bir az dada nadana

Deyər yaxşı adam odu ki, odu.

Gərək baxasan ki, dona, don ola

Səryidə quruya, dona, don ola

Bəxtiyar, hər tərəf dona, don ola

Sönməz ürəyimin odu ki, odu.

6

Kimdi düz adamı vecinə alan

Sarsağın, yanqırın zəmanəsidi

Gülməli görünür ipək adamlar

Cırığın, cındırın zəmanəsidi.

Yüz haqqı yeyənlər siftə edirlər

Kim nə edəsidi, lap da edirlər

Pulu olanlara qibtə edirlər

Haman o andırın zəmanəsidi.

Nadanlar söhbəti sözdən salırlar

Əyrilər yolunu düzdən salırlar

Ağır havaları gözdən salırlar

İndi də dınqırın zəmanəsidi.

Qaçır bu yerlərdən hərə bir yolla

Ölü yerlərini çatdırmır molla

Həmzə Çənlibeldə yapdırıb villa

Keçəlin, şıldırın zəmanəsidi.

Kar etmir heç kimə öyüt, Bəxtiyar

Dərdi öz içində üyüt, Bəxtiyar

Birtəhər uşağı böyüt, Bəxtiyar

Gədənin, dılğırın zəmanəsidi.

7

Əzəldən binanın himi himdisə

Yüz qat möhkəm olar dayaqlısından

Daha qorxuludu məkrli alim

On-on beş nadanın çomaqlısından.

Qədəm bas, a bala, düz yol yaxşıdı

Olsun çal-keçir yol, toz yol, yaxşıdı

Dördayaqlı çaqqal yüz yol yaxşıdı

Çaqqalların iki ayaqlısından.

Beş mərtəbə söz götürüb yüksəldi,

Gədə bir mərtəbə irəli gəldi

Bar ağacı yarpaqsız da gözəldi

Köhnə fızıllığın yarpaqlısından.

Bu dünyada bir gör-götür yaxşıdı,

Bir də hörmət, izzət, xətir yaxşıdı

Hər yükə tab edən qatır yaxşıdı

Alaşa madyanın daylaqlısından.

Yaralı Bəxtiyar özünə bəydi

Heçə dəyməyənlər xətrinə dəydi

Caynaqlı yırtıcı nəmənə şeydi

Qorxginan insanın caynaqlısından.

8

Eybəcər dünyadı eybəcər həyat

Döndərər atlası cındıra, bilməz

Neçə ucaları alçaq eyləyər

Alçağı çıxardar hündürə, bilməz.

Boşboğaz bir gapı yüz təkrar edər

Yaxşı iş xəbisin yerin dar edər

Nadan dediyində çox israr edər

Yüz alim yığıla, qandıra bilməz.

Ya nökər olasan, fərqi yox, ya xan

Fələyin əlindən qurtarmaz yaxan

Çox vaxt bir mahalı yandırıb-yaxan

Çöllükdə bir ocaq yandıra bilməz.

Yaralı Bəxtiyar, azdı düz adam

İnanma hamıya, düzdü az adam

Qəlbimi sındırar gündə yüz adam

Kimsə mənliyimi sındıra bilməz.

9

Əppəyin verirəm, suyun verirəm

Bilmədim canımın azarını mən

Paltarda, palazda aldana billəm,

Tanıram insanın astarını mən.

Yüz haldan keçmişəm halıma baxın

Yolumun tərsinə selləndi axın

Şahdan doğma bildim, vəzirdən yaxın

Çölün gürzəsini, şahmarını mən.

Ehtiyac qapını əcəltək döyür

Kasıba gün-saat yoxdu bir hoyur

Bu dünya gözəldi deyən düz deyir

Görmədim qəhbənin yassarını mən.

Bilinmir dünyanın düzü, oğrusu

Doğrum yalan oldu sözün doğrusu

Üzdü ürəyimi damar ağrısı

Tutunca həyatın damarını mən.

Yaralı Bəxtiyar deməz boşuna

Söz var heçə dəyər, söz var qoşuna

Hər kim mənəm deyib döydü döşünə

Görmədim düz əhdin, ilqarının mən.

10

TƏCNİS

Dünya bir sual ki, cavabı var, yox

Nə bir testə düşüb, nə bəndə, bəndə

Nə bir üslubu var, nə qafiyəsi

Nə vəznə uyğundu, nə bəndə, bəndə.

Pisliyi dünyadan at anrı, Tanrı

Atlı belə gedir, at anrı, Tanrı

Dəyməsin xətrinə a Tanrı, Tanrı

Nə Tanrı Tanrıdı, nə bəndə, bəndə.

Bəxtiyar, əl işə vardı, qabardı

Halalca dövlətdi, vardı, qabardı

Könlümün dalğası vardı, qabardı

Nə bir yerə sığar, nə bəndə, bəndə.

news-inner-user

12867 məqalə

Paylaş

Oxşar xəbərlər

Xəbər lenti

Məhəmməd peyğəmbərdən həyat dərsi
21:00 18 Oktyabr 2019
Filmimiz beynəlxalq kinofestivalda
18:45 18 Oktyabr 2019
Azərbaycan kinosunun inkişafı ilə bağlı xərclər 6 milyon manat artırılır
18:17 18 Oktyabr 2019
Quşları heç kəs öpmür – Salam Sarvandan tərcümələr
17:46 18 Oktyabr 2019
Günel Natiqin kitabı çıxdı
17:01 18 Oktyabr 2019
Şoka düşən Bakı, diri-diri yanan əsgərlər, 5 dəqiqənin hökmü - Səbuhi Sədəf yazır...
16:16 18 Oktyabr 2019
Performativ meditasiya: Eucenio Barbanın tənqidi – Aydın Talıbzadə yazır...
15:47 18 Oktyabr 2019
“Bir şeir” müsabiqəsinin mükafatlandırma mərasimi - Video
15:14 18 Oktyabr 2019
Azərbaycan teatrının Oyun Babası - Vaqif İbrahimoğlu 70
14:21 18 Oktyabr 2019
Milli azlıqların antologiyası təqdim olunub
13:41 18 Oktyabr 2019
Bir qrup mədəniyyət xadiminə mükafatlar təqdim edilib - Fotolar
13:02 18 Oktyabr 2019
İsi Məlikzadənin hekayələri Kulis-də
12:51 18 Oktyabr 2019
Qadını pisdir deyə narkotikaya qurşananlar – İlqar Kamil yazır…
12:01 18 Oktyabr 2019
Müstəqil Azərbaycanın ən yaxşı romanları - Siyahı
11:25 18 Oktyabr 2019
"Netflix" "Eşq" romanından serial çəkəcək
10:55 18 Oktyabr 2019
Xalq artistinə ev verildi
10:15 18 Oktyabr 2019
“Yuğ”da "Müəmmalı bir qətlin üç versiyası”
09:52 18 Oktyabr 2019
Ucdantutma hamını bir-bir öpürdüm – Bircənin romanı
08:55 18 Oktyabr 2019
Nobeli alan yazıçının ilk müsahibəsi: “Qorxuram...”
21:00 17 Oktyabr 2019
Adil Cəmilin 65 illik yubileyi qeyd edilib
18:40 17 Oktyabr 2019