news-inner
clock15:10 calendar-gray 16 Avqust 2017 view-gray1064 dəfə oxunub
view-gray1064 dəfə oxunub

Bir tək sənə yaraşır bu yay bütün geyimlər – MƏTLƏB AĞANIN ŞEİRLƏRİ

Kulis.az Mətləb Ağanın şeirlərini yeni redaktədə təqdim edir.

***

Səhər səndən açılır,

gün batır sən tərəfdən...

nə yazsam, “sən” çıxırsan

otuz iki hərfdən...

...“sən”sən on iki dəfə

saatdakı rəqəmlər...

yolda min kərə hər gün

çıxır qarşıma “sən”lər...

...baxıram - hər yerdəsən,

sənsən bu boyda ölkə...

elə o əsən külək,

ya da bu isti bəlkə...

...bir tək sənə yaraşır

bu yay bütün geyimlər...

səndəndi- nə oxusam;

hekayələr, şeirlər...

...söhbətlərdə birinci

sənin adın çəkilir...

rəssamlar nə çəkirsə,

tək bir qadın çəkilir...

...amma bir söz demişdim,

anlamadım deyirsən:

“bir - güzgüdə gördüyün

o qadın sən deyilsən...”

***

Bax - yenə də bürküdür,

şəhərin hər qarışı...

külək də yox, biləsən,

ağaclar nə danışır...

...pəncərədə bütün gün

günəşin qürub çağı...

...qarışdırır hər şeyi,

zalım vaxtın barmağı...

...saatı da gün vurub,

ağır-ağır tərpənir...

arabir lap çaşarsan:

“mənəm bu adam, yəni?!”

...nə desələr, susarsan:

“düzünü Allah bilər...”

...özünü inandırıb,

yaşayarsan bax belə...

...təzələyər havanı

arabir köhnə şəklin...

şükür, o da olmasa,

boğulub öləcəkdim...

...məndən məktub alarsan,

bu axşam tək bir sətir:

“havalar lap çox qızır,

yenə bir şəkil gətir...”

***

Bir addım o tərəfdə

gecənin qaranlığı...

...belə olur - təkliyin

yoxsul firavanlığı...

...acıq verir keçmişə

saatın çıqqıltısı

hər gün xatirələrin

ölür beşi-altısı...

...adın da unudulub,

getdiyin neçə gündü...

mən də dəyişməmişəm,

nə varsa - gördüyündü...

...özün şahidi oldun;

uzun çəkmir bu işlər...

düz deyil yazılanlar,

yalandır, nə demişlər...

...ancaq bir zəng vur indi,

ya bir məktub yaz bu gün:

“mən bir azdan gəlirəm,

yuxudur bu gördüyün...”

***

Baxdığın bir tavandır,

fikirləşdiyin bir o...

səssizliyi hürküdür

hərdən köhnə radio...

hey fırlanır özüyçün

saatın əqrəbləri...

haçandı unutmusan

ovcundakı həbləri....

tozlu, köhnə şəkillər

döşəmədə dincəlir...

sanki filmə baxırsan

- kədərli, işgəncəli...

nə qədər görəcəksən,

sən bu ağ- qara filmi:

rolda tək bir nəfərdi,

ölüb qurtara bilmir...

***

Lap az qalıb sabaha,

gedənlər - yığışırlar...

hərdənbir qaranlığa

gülüb keçir maşınlar...

lap uzaqda bir qatar

cırır öz yaxasını...

...bəlkə səhər gec olar,

indi tutum yasını?..

səndən bir tək xəbər yox,

“ölüsən, sağsan”- deyim?

“beş gün keçsə aradan

unudacağsan”- deyim...

dünən deyildi bəlkə,

min ildi burda yoxsan...

yəqin səni görərəm,

durub güzgüyə baxsam...

bəlkə burda olarsan,

saatı geri çəksəm...

...ya, “sən” desəm, özünü

yanımda görəcəksən...

...deyəcəksən: “çox şükür,

nə yaxşı ki, çağırdın...

mən min ildi oturub,

səninçün darıxırdım...”

***

Yağış kəsdi deyəsən,

küçələr də susdular...

işıqlar yenə bir-bir

gecəyə uduzdular...

…stol üstündə şəklin

düşüb üzüstə qalıb...

otağda nəfəsindən

hələ də isti qalıb...

…yəqin sən də bilirsən;

üç gün, beş gün…bitəcək…

sonra eyni şey olur,

ya adam ol, ya böcək…

…tökülür üst-başından

sonda illərin pası…

xatirəylə başlayır

ölümün əlifbası….

…bu gün bağışlanarsan,

sabah əfv öyrənərsən…

o verdiyim kitabı

hərf-hərf öyrənərsən…

***

Bayırda soyuq gecə-

yəni - qaranlıq, hüzün...

döyəcləyir saatlar

yorulmuş ömrümüzü...

dilsiz-ağızsız sükut

danışdırır təkliyi...

ikimizin şəklimiz

yenə məni təkləyir...

...pəncərədən otağa

tökülür yağış səsi...

səndən bir ümid qalıb,

onu da bu qış kəsir...

havanın da elə bil

üzü dönüb bu axşam...

işıqlar da şəhərdə

yenə sönüb bu axşam...

...bundan belə fərqi yox,

bilirik mən də, sən də...

...bir azdan işıqları

yanacaq şəhərin də...

***

Çox dəyişib bu şəhər,

yolu, parkı, dənizi...

görən, sonuncu dəfə

kim görüb burda bizi?..

...hardasan bu dəqiqə,

neyləmisən özünü?

karıxıb, güzgülərdən

gizlədirsən üzünü...

...çəkilib bir tərəfdə

özünçün qocalırsan...

bilirəm, təkbaşına

bizdən heyif alırsan...

...qarımış xatirələr

bir bucaqda can verər...

...heç bir nəfər də yoxdur,

yerimi nişan verə...

"...zəng də çatmırdı sənə,

harda idin səhərdən?.."

"səni, məni gəzirdim,

biz olmayan şəhərdə..."

Oxşar xəbərlər

Xəbər lenti

Şuşada ilk dəfə Milli Musiqi Günü keçirilir - Fotolar
14:36 18 Sentyabr 2021
Yaqub Zurufçu xanımından niyə boşanmışdı? - Video
13:30 18 Sentyabr 2021
Mədəniyyət naziri: “Şuşaya onun ruhunu qaytaracağıq”
12:40 18 Sentyabr 2021
Fərhad Bədəlbəyli: "Artıq bu, həqiqətdir”
12:29 18 Sentyabr 2021
Üzeyir Hacıbəylinin məzarı ziyarət olunub - Fotolar
11:30 18 Sentyabr 2021
Nazirliyin bəstəkarlara vurduğu zərbə - Firudin Allahverdi yazır...
10:34 18 Sentyabr 2021
Cümhuriyyət ərəfəsində Üzeyir Hacıbəyovu İranda qalmağa vadar edən nə idi? – Vilayət Quliyev yazır
09:01 18 Sentyabr 2021
1937-ci ildə həbs edildi, sevdiyi qadını güllələdi, oğlunun boş tabutunu basdırdı... - Bağırov haqqında qeyri-adi faktlar
21:00 17 Sentyabr 2021
Azərbaycanlı skripkaçı birinci yerə çıxdı
19:16 17 Sentyabr 2021
"Arşın mal alan” Çində təqdim olunub - Fotolar
18:45 17 Sentyabr 2021
Məşhur İspan yazıçısı vəfat etdi
18:15 17 Sentyabr 2021
Azadlıq qılıncların oxuduğu nəğmədi – Rüstəm Behrudinin şeirləri
17:30 17 Sentyabr 2021
Təşəkkür edirəm ayaqlarımın səsinə - Yeni şeirlər
17:07 17 Sentyabr 2021
Sezen Aksudan yeni mahnı - Video
16:55 17 Sentyabr 2021
Məşhur tarzənə ev verildi
16:17 17 Sentyabr 2021
Bir sıra mədəniyyət işçilərinə fəxri adlar verildi - Siyahı
15:50 17 Sentyabr 2021
Deşikli daş pirinin möcüzəsi: İnanaq, yoxsa gülüb keçək?
15:30 17 Sentyabr 2021
Sənubər İsgəndərli yeni veriliş açır
14:10 17 Sentyabr 2021
Sevgilisi: "Vüqara yaraşmayan qadınlar qəbrinin üstündə hoqqa verir"
13:01 17 Sentyabr 2021
Narkotikaya qurşandı, cibindən 11 min manat oğurladılar, küçədə ağlaya-ağlaya pul diləndi – Oğlunun faciəsində Səyavuş Aslanın günahı
12:30 17 Sentyabr 2021