Kamal Abdullanın yeni “Düma ilə Coys arasında” adlı ədəbi-tənqidi esselər kitabı işıq üzü görüb. Kulis.azın məlumatına görə kitab Azərbaycan Milli Elmlər Akademiyasının vitse-prezidenti, akademik İsa Həbibbəylinin “Bir dünyalıq ədəbiyyat söhbəti, yaxud esselərdən ibarət roman” adlı önsözü ilə başlayır.

Müəllif kitabda məşhur italyan romançısı Umberto Eko ilə görüş təəssüratlarını, bu görüş əsnasında baş tutan ədəbiyyat söhbətlərinin ədəbi arealının Düma ilə Coys yaradıcılığı arasında cərəyan etdiyini, bu ədəbi məkanda Azərbaycan ədəbiyyatında, ədəbi tənqidində baş ədəbi prosesin yaratdığı assosiasiyalar, müasir Azərbaycan ədəbiyyatının gənc yazarlarının yaradıcılığındakı yeni parıltılar, müstəqillik dövründə qələmə alınan əsərlərlə bağlı düşüncələr, ədəbiyyatımızdakı “boşluq dolduranlar” haqqında fikirlərini ifadə etmişdir. Kitabda irəli sürülən fikirlər müxtəlif məzmunlu ricətlərlə bağlanaraq daha da rəngarəng şəkil alıb.

K.Abdulla burada həmçinin özünün yazdığı romanlarla bağlı müəllif, eyni zamanda bir oxucu kimi də münasibətini ortaya qoyub.

Kitabdakı “Birun-əndərun oyunları” adlı essedə bədii mətnlərdəki söz oyunlarına, “Don Kixotun ölümü”, “Aldanmış oxucu” və başqa esselərində isə müəllif-əsər-oxucu üçbucağında baş verən proseslərə, bu üç faktor arasındakı münasibətlərə K.Abdullanın özünəməxsus münasibəti öz əksini tapmışdır.

• Rejissor Kənan MM və yazıçı Orxan Saffari arasında barışıq əldə olunub - YENİLƏNİB
• İtaət və üsyanın toqquşması - "Bakı Balacalar Teatrı"ndan tabuları sındıran tamaşa
• “Qərbi azərbaycanlıların milli geyim irsi” sərgisi açıldı