“Yazı” ədəbiyyat dərgisinin uşaqlar üçün əlavəsi - “Yemliy”in ilk sayı çapdan çıxıb. Dərgi məsul redaktor Sevinc Elsevərin giriş yazısı ilə açılır.

Şeir bölməsində Hüseyn Cavid, Əli Kərim, Mirmehdi Seyidzadə, Murad Köhnəqala, Nərmin Kamal və Sevinc Elsevərin uşaqlar üçün şeirləri, nəsr bölümündə Əkrəm Əylisli, Azad Qaradərəli, Rasim Qaraca, Seymur Baycan, Nərmin Kamal, Mirmehdi Ağoğlu, Aygün Bünyadzadə, Sevinc Nuruqızı, Alov İnna, Əfsanə Laçının hekayələri, Sevinc Elsevərin “Donu qırmızı” romanı çap olunub.

Dərgidə ən maraqlı rubrika yəqin ki, “Uşaq yazıçılar”dır. Burada Nilufər, Ülvi, Nərmin kimi balaca qələm dostlarımızın yazıları yer alıb.

Çevirmə yerində İ.S.Turgenev, Əziz Nesin, Umberto Eko, Madonna, L.Frank Baum kimi yazarların uşaqlar üçün yazdığı hekayələr, eyni zamanda müxtəlif ölkələrin xalq nağılları verilib.

“Təbriklər” bölümündə müxtəlif məktəb və bağçalardan olan uşaqlar dərginin əlavəsinin ilk sayını təbrik edirlər.

“Rəssam uşaqlar” rubrikasında Maya, Nərmin, İzel və Rəşidin rəsmləri çap olunub. “Yeni nəşrlər” bölməsində Kitabsevərlər qrupunun senzor.org saytı ilə birgə çap etdikləri “Gəlincik evi” kitabı (dünya uşaq ədəbiyyatından seçmələr) haqqında yazı yer alıb. İlk iri həcmli – 144 səhifəlik uşaq dərgisində adını çəkə bilmədiyimiz digər maraqlı yazılarla da tanış olmaq mümkündür.

“Yemilik”də dərc olunan rəsmlərin bir çoxunun (üz qabığı da daxil) müəllifi tələbə rəssam Gülbəs Ayvazdır.

“Yemliy”i həftənin sonunda kitabevim.az kitab marketindən əldə edə bilərsiniz.

• Vaqif Mustafazadənin 85 illik yubileyi keçirildi
• İlham Əliyev “Zayed İnsan Qardaşlığı Mükafatı”na layiq görüldü
• Əlimi tut, bütün həyatımı da al... - Günün mahnısı