news-inner
clock09:00 calendar-gray 27 Oktyabr 2014 view-gray6195 dəfə oxunub
view-gray6195 dəfə oxunub

Elməddin: “Mən toylara 7 il əvvəl yox demişəm”

Kulis.Az-ın “Yeməli söhbət” layihəsinin qonağı məşhur yumorist Elməddin Cəfərovdur.

- Elməddin müəllim, xoşladığınız yeməklər hansıdır?

- Birmənalı olaraq ət yeməklərini sevirəm. Qoyun, toyuq, balıq xüsusən də balığı lap çox xoşlayıram. Bircə broyler toyuqlarını sevmirəm. Onların budu çox böyük olur. Bəzən broyler toyuqlarının budlarını qoyun budlarına oxşadıram.

- Kababla aranız necədir?

- Yalnız “antrikod”u bəyənirəm.

- Yemək bişirə bilirsiz?

- Əslində, mən çox yaxşı yemək bişirirəm, amma kollektiv inanmır. İşdə yemək olmayanda dostlara deyirəm ki, mən yemək bişirim. Qoymurlar. Amma vallah mən yaxşı yemək bişirirəm. Yaxşı pomidor-yumurta və ayran hazırlaya bilirəm.

- Tələbə yeməklərini necə?

- Mən məktəbdə oxuyanda təbii ki, yeməyi anam bişirirdi. Sonra elə yaşadığım Gəncədə universitetə qəbul oldum. Universiteti bitirən kimi evləndim. Buna görə, özümə qulluq eləmək imkanım az oldu. Adam yemək bişirəndə dincəlir.

- Mən bilən, həyat yoldaşınız Zaqataladandır. Zaqatala mətbəxi ilə aranız necədir?

- Zaqatala mətbəxində xəmir xörəkləri çoxdur. Xəmir xörəklərindən xoşum gəlmədiyi üçün elə çox yemirəm. Zaqatala mətbəxi gürcü mətbəxinə yaxındır. Zaqatalada ətə turşu vururlar. Mən bunun əleyhinəyəm. Ətə turşu vuranda dadı qaçır. Hər şeydə təbiiliyin tərəfdarıyam.

- Evdə hansı mətbəxə üstünlük verirsiniz?

- Birmənalı olaraq Gəncə mətbəxi. Uşaqlar da o mətbəxi sevir. Həyat yoldaşım bilir ki, öz mətbəxlərinə uyğun yemək hazırlasa, hamısını özü yeməli olacaq. Gəncə mətbəxi çox zəngindir.

- Sizcə, özəlliyi nədir?

- Gəncə mətbəxi ilə Göyçə mətbəxi oxşardır. Göyçə mətbəxinin yeməkləri ilə böyüdüyümə görə, təbii olaraq Gəncə mətbəxini də sevirəm. Gəncə mətbəxində Xan plovu var, çox bəyənirəm. Mənə elə gəlir ki, Azərbaycanda ən yaxşısı Qərb mətbəxidir.

- Toylara aparıcı kimi gedəndə nə yeyirsiniz?

- Mən 5-6 ildir toylara aparıcı kimi getmirəm. İçki olan toylara getmirəm. Bu da o deməkdir ki, 90 faiz toylara getmirəm. Toy yeməklərini, demək olar ki, yemirəm. Çünki bəzən, o yeməklər köhnə olur. Həm də ümumi bişirilən yeməklə özəl bişirilən yemək eyni deyil. Hər halda 500 nəfərə bişirilən yeməklə 4 nəfərə bişirilən yemək eyni dadı vermir. Mən yeməyi doymaq üçün yox həzz almaq üçün yeyirəm.

- Bəzi yazarlar “Toylara yox de” adlı kampaniya keçirir. Buna münasibətiniz necədir?

- Bizim toylarda 30 çeşid yemək verirlər. Mən elə insanlar tanıyıram ki, toy eləmək üçün borca girir. Biz niyə toy məsələlərində Avropaya baxmırıq. 800 manata 800 adama toy eləyirlər. 7-8 mərtəbə tort bişirirlər. 4-5 çeşid şirə, bir də balaca şirniyyat. Biz belə etsək olmaz? Bizim toylarda adamlar əlində araq tutub Allahdan evlənənlərə dua edir. Amin deyilən yerdə araq içirlər. Ailənin bünövrəsini haramla qoyurlar. Bir nəfər 50 müğənni çağırır toya, fişənglər, bahalı maşınlar... Sonra borclu qalır. Bu gün toy edəndə bütün planları bəylə gəlinin xoşbəxtliyi üzərində qurmaq lazımdır. Mən toylara 6-7 il qabaq yox demişəm. Yox deməyimin səbəblərindən biri də israfçılıqdı.

- Toylara aparıcı kimi gedən vaxtlarınızda başınıza maraqlı hadisələr gəlməmiş olmaz...

- Biz efirə təzə çıxan vaxtlarda rayonlardan birinə “palatka” toyuna getmişdik. Toyda çölə çıxmışdım. Birdə gördüm, arxadan bir nəfər qışqıra-qışqıra deyir: “Ay adam güldürən, ayaq saxla!”

- Dieta saxlayırsınız?

- Yayda mənə dostlar deyirdi ki, çox kökəlmisən, dieta saxla. Deməli iki gün ancaq çay, su içdim. Sonra baxdım ki, cəmi 200 qram arıqlamışam. Yəni tərəzidə hiss olunmurdu. Dəhşət əsəbləşdim. Gecə saat 2-də o qədər yedim ki, gördüm ölürəm. Danışa da bilmirdim.

- Fast-foodla aranız necədir?

- Fast-fooddan həmişə qaçmışam. Fast-food yemək deyil, sadəcə mədəni aldatmaqdır.

- Sevgilinizlə ilk dəfə nə yemisiniz?

- Mənim ilk sevgilim indiki həyat yoldaşımdır. Mən həyat yoldaşımla 4 il Gəncə Dövlət Universitetində bir partada oturmuşuq. Dördüncü kursda nişanlandıq. Gəncədə o vaxt indiki şərait yox idi. Yəni, tələbə yoldaşınla gedə biləcəyin bir kafe yox idi. Gəncədə bir park idi və biz o parkda oturub şirniyyat, peraşki yeyirdik. Ümumiyyətlə, mən peraşkini çox sevirəm.

- Restorana gedəndə əsasən nəyə üstünlük verirsiniz?

- Əsas xidmətə. Bunun içinə ofisiantın geyimi də daxildir. Əgər ofisiant geyiminə fikir verirsə, demək o, yeməyi də səliqəli gətirəcək. Dostlarımla həmişə getdiyimiz bir restoran var idi. Bir il hər gün naharımı orda etdim. Axırıncı dəfə həmin restorana qonağımla getdim. 3 tikə ət qoyub, 40 manat hesab istədilər. Ofisianta dedim, qardaş, efirdə görürsünüz, elə bilirsiniz, milyanerik? Yeməyi yemədən pulu verib çıxdım və bir də həmin restorana getmədim.

- Təbiət qoynunda yeyib-içməyi xoşlayırsınız?

- Kollektivlə gedirik. Amma son vaxtlar o qədər qəzalar olur ki, avtomobillə uzaq yola çıxmaqdan qorxuram. Bu yay dostlarla Lerikə getmişdik. Yeməyi özümüz bişirməsək də, yaxşı istirahət elədik. Təbiətdə insanın bütün zehni yorğunluğu çıxır.

- Ova gedirsiniz?

- Mənim qardaşım ovçudur. Bir dəfə onunla ova getmişdik. Sevmədim. Soyuq, söhbət edə bilməmək, ov tapmaq adamı yorur. Qardaşım dovşana güllə atanda bilərəkdən səs çıxartdım ki, qaçsın. Sonra gördüm yox e... acından ölürəm, sakit durdum, bir dovşan vurdu, yeyib qayıtdıq.

- Sənətinizdə nə yeniliklər var?

- İnşallah, gələn ay “Qız atası” serialının çəkilişinə başlayırıq. Mətanət Əliverdiyeva baş rolda çəkilib. Serialın quruluşçu rejissoru Ramin Hacıyev, ssenaristləri Ənvər Abbasov, Samid Ağayev, Elnur Hüseynovdur. Bu serialın çox uğurlu olacağına əminəm.

- Sizi kim güldürə bilir?

- Məni yumoristlərin hamısı da güldürə bilər, heç biri də. Gülmək məsələsi həm də ovqatımdan asılıdır. Azərbaycanda ən çox güldüyüm aktyor Fərdadır. Onunla çox işlədiyimə görə, zarafatlarını tam başa düşürəm.

- Elə toy olub ki, gedəsiz, pulunuzu verməyələr?

- Olub. Bir dəfə zəng gəldi ki, vallah imkanımız yoxdur, amma istəyirik toyumuzu siz aparasız. Dedim, gəl söhbət edək. Fikrimizdə kasıb bir adam canlandı. Üstündən az keçmiş, gördük, bizim kasıb dediyimiz Nissan Murano ilə gəldi. O vaxt Bakıda 3-4 Murano var idi. Fərdanın köhnə “Mercedes”i var idi. Fərda Muranonu görüb maşınını gizlətdi. Daha doğrusu, maşın özü utandığından gizləndi. Bu adama dedik ki, qardaş, hərəmiz min manata gəlirik, amma sizə güzəşt edib ikimizə 1500 alarıq. Qonağımız dedi ki, sizə cəmi 500 manat verə bilərəm. Fərda buna dedi ki, elədirsə, biz havayı gələrik. Bir sözlə, biz dediyimiz qiymətə razılaşdıq, amma toyda pul vermək istəmədi. Dedi, 500 manatdansa havayı gəlmək istəmirdiniz? Fərda sağ olsun, birtəhər 500 ala bildi. Aldığımız pulun 300 manatını yolxərci elədik.

Elə toy olub ki, dava düşüb pulsuz qayıtmışıq. Bir dəfə rayonların birinə toya çağırmışdılar. Bəy gəlinin keçmiş sevgilisinin dostu imiş. Gəlinin keçmiş sevgilisi Rusiyadan toya gəlmişdi və toyda mikrofonu alıb oğlana dedi ki, sən düz hərəkət eləmədin. Gərək mənim sevdiyim qızla evlənməzdin. Dava düşdü. Polis gəldi şadlıq evinə və toy dağıldı.

news-inner-user
Fuad Cəfərov

50 məqalə

Paylaş

Oxşar xəbərlər

Xəbər lenti

Əlyazmalarını 15 qəpiyə satan azərbaycanlı dahi
13:15 18 Sentyabr 2019
Özbək ulduzlar Bakıda
12:42 18 Sentyabr 2019
Elçin: "Azərbaycan ədəbiyyatı bu gün parlaq dövrünü yaşamır" – Müsahibə
12:01 18 Sentyabr 2019
Yazıçıların seks travması – Müşfiq Şükürlü yazır...
11:40 18 Sentyabr 2019
Filmimiz festivalda Kim Ki Dukun filmi ilə yarışacaq
10:52 18 Sentyabr 2019
Boğazı kəsilən Əminə Bulutun adı Luvr muzeyində
10:20 18 Sentyabr 2019
Müşfiq Hətəmov “Azərbaycanfilm”dən getdi, yerinə təyinat oldu
09:53 18 Sentyabr 2019
Mirzə Cəlilin Şuşada dəfn olunmaq arzusu – Bilmədiyimiz gerçək
08:50 18 Sentyabr 2019
Atatürk dahi memarın qəbrini niyə açdırdı? - Araşdırma
21:00 17 Sentyabr 2019
Mədəniyyət xadimlərinə fəxri adlar verilib - Sərəncam
18:25 17 Sentyabr 2019
Üzeyir Hacıbəylinin xatirəsi anılıb
18:11 17 Sentyabr 2019
Mən Vicdanam – Şamxal Həsənovdan hekayə
17:29 17 Sentyabr 2019
Gedənlər və yol gedənlər... - Esse
16:40 17 Sentyabr 2019
Teatrımız Beynəlxalq Festivalda səhnə alacaq
16:06 17 Sentyabr 2019
Bu universitetin tələbələri indi məşhur yazıçılardır – “Qorki” xatirələri
15:37 17 Sentyabr 2019
Əlif Şəfəq plagiat iddialarına cavab vermir
14:45 17 Sentyabr 2019
Tanınmış caz ifaçısı Bakıda çıxış edəcək
14:07 17 Sentyabr 2019
Həyat Şəminin kitabları təqdim olunacaq
13:26 17 Sentyabr 2019
ŞAH MAT-da absurd tamaşası olacaq
12:53 17 Sentyabr 2019
Diqqət! Diqqət! Kulis.az şeir müsabiqəsi elan edir! – Şərtlər
12:15 17 Sentyabr 2019