16-18 sentyabr tarixində Bakı İdman Sarayında IV Beynəlxalq Kitab Sərgi-yarmarkası öz işinə başlayacaq.

Bu barədə Kulisə Mədəniyyət və Turizm Nazirliyindən məlumat verilib. Tədbirdə dünyanın müxtəlif nəşriyyatlarının çap işlərinin nümayiş olunacaq, tanınmış müəlliflərlə görüşlər, təqdimatlar, mühazirə və müzakirələr keçiriləcək.

Mədəniyyət və Turizm Nazirliyi Kitab dövriyyəsi və nəşriyyatlarla iş şöbəsinin müdiri Vaqif Bəhmənli sərgi ilə bağlı bunları bildirib: “Bəzi dövlətlərin naşirləri, xüsusən də MDB ölkələrində bilirlər ki, bizdə rus dili mühiti var və onlar öz kitablarını burada sərbəst sata və təbliğ edə bilərlər. Ona görə də bu tolerant mühitdən yetəri qədər yararlanmağa çalışırlar. Bundan başqa, Türkiyə və İran nəşriyyatları da sərgimizə maraqlıdırlar və məmnuniyyətlə gəlib iştirak edəcəklər. Sərgidə Azərbaycanda fəaliyyət göstərən səfirliklər də öz ölkələrinin kitab istehsalı nümunələrini müəyyən olunmuş stendlərində nümayiş etdirəcəklər”.

100-ə yaxın yerli nəşriyyat və poliqrafiya müəssisəsinin iştirakı nəzərdə tutulan sərgi maraqlı proqramı ilə də diqqət çəkir. Belə ki, sərgi-yarmarka çərçivəsində yerli və xarici nəşriyyat təmsilçilərinin işgüzar toplantıları, ALİSA proqramının (mərkəzləşdirilmiş elektron kitabxana sistemi), eləcə də “Yazıçı və şairlərimizi dünyaya tanıdaq” seriyasının təqdimatı, “Qızıl kəlmə” ədəbi mükafatının laureatları ilə görüş, bir sıra xarici kitabxanalarla Azərbaycan Milli Kitabxanası arasında əməkdaşlıq protokollarının imzalanma mərasimləri təşkil olunacaq.

IV Bakı Beynəlxalq Kitab Sərgi-Yarmarkasının rəsmi internet saytı (www.bakubookfair.com) var. Burada sərgi-yarmarka haqqında daha ətraflı məlumat almaq olar.

• İnsan Hüquqları Gününə həsr olunmuş sərgilər açıldı
• "Aşıq Ələsgərin anım tədbirləri” layihəsi çərçivəsində növbəti tədbir keçirildi
• Qazaxıstan Prezidenti Məti Osmanoğlunu təltif etdi