Kulis.az şair Məmməd İsmayılın yeni şeirlərini təqdim edir.

***
Bu qədər şəhidi
olan ölkənin
Qocası ölümdən
qorxan deyil ki...

Titrək əllərində əsa umudu
Yaşamaq öyrənir ömür ağrıdan.
Yəni doğrudanmı yaşamaq budu,
Yəni doğrudanmı?
Yəni doğrudan!

Sona nə yazıbmış kor olası baxt
Uzaq yaxın olmur, yaxın uzaqmı?
Taleyin sözünə baxmırdı bir vaxt
İndi də ayağın sözünə baxmır.

Gəlib gəlmədiyin bəlli deyil ki
Nə torpaq sevinər, nə ayaqların.
Burdan başlamışdı hər şeyin ilki
Və... uşaq çağların - uzaq çağların.

Yüz il yaşasa da ömrün gözü ac;
Yəqin, gəncliyimi gətirib yada.
Halıma nəfəsi təngiyən yamac
Dərədən təpəyə ayaq açmada...

Batır qocalığın çıxardığı səs
Ürəyin yamacda mələyən quzu
Neyləsin yerinə utanan həvəs,
İçində qönçəsi qan olan arzu?

İstəsən haqqını istə ki, haqdan
Güc verən tək olan Allahdır, təkə.
Axsaq ayağına baxıb uzaqdan
Çıxdığın zirvələr xəcalət çəkər.

Qocalan gözlərin düşüb çuxura
Ay batır, gün doğub gününü sayır.
Özünü bənzətmə axsaq Teymura
Tək sən axsamırsan dövran axsayır.

Kim yola qaytarsın yoldan sapanı
Canından keçmədə ruhun ağrıdan.
Yəni doğrudanmı çevrə qapanır
Yəni doğrudanmı?
Yəni doğrudan!

Heyrətə salmaz ki halın bir kəsi
Arı da çiçəkdən bal tapmır bəzən
Ey gücü tükənən çəkim mərkəzi,
Ən yaxın dostların ən uzaq gəzən.

Amma qocalığa çatmaz hövsələn
Cismin üşürgənər bu son çağrıdan.
Yəni doğrudanmı ölümdü gələn
Yəni doğrudanmı?
Yəni doğrudan!

Bəlkəmi? Bir sonu varmı bəlkənin,
Borc desək, borcumuz bir can deyil ki?!
Bu qədər şəhidi olan ölkənin
Qocası ölümdən qorxan deyil ki?!

Tovuz-Əsrik,
6-7 avqust 2022


Yaxarış...

Nəynən düşür ayaqları olmayan axşam?
Səhər hansı ayaqla gəlir,
Və... xəbər hansı ayaqla?
(Acizdi Süleyman peyğəmbəri
öləndən sonra da
ayaqda saxlayan
Əlimə aldığım əsa...)

Səhərə,
axşama,
xəbərə verdiyin ayaqlardan
mənə də ver, Allahım,
Nolar, nolar məni də ayaqda saxla...

• Məşhur müğənni bir aydan sonra komadan ayıldı
• İdris Elbadan Ceyms Bondla bağlı sərt açıqlama: "Qaradərili agenti qəbul etməyəcəklər"
• "İnsanın qarşılaşdığı suallar..." - Hüseyn Cavid niyə bu gün də aktualdır?