Bir-birinə dırmaşa-dırmaşa qabağa gedənlər - Rahid Ulusel

Bir-birinə dırmaşa-dırmaşa qabağa gedənlər - Rahid Ulusel
17 sentyabr 2024
# 11:00

Kulis.az Rahid Uluselin "Dalqabaq-Tarix" adlı qaravəllisini təqdim edir.

Şahın nökərinin oğlu oldu, adını qoydu – Şahqulu. Xanın nökərinin oğlu oldu, adını qoydu – Xanqulu. Bəyin nökərinin oğlu oldu, adını qoydu – Bəymalı.

Şahın, Xanın, Bəyin kənizləri bic doğdu, adlarını qoydular – Maqqulu. Şahqulular, Xanqulular, Bəymalılar, Maqqulular böyüdülər, dəkkəlləşdilər. Orda-burda tək-tük yetişən alp-pöhrələri yedilər, yekəldilər. Məmləkəti Şahquluxanaya çevirdilər.

Maqqulu Bəymalıya, Bəymalı Xanquluya, Xanqulu Şahquluya dırmaşa-dırmaşa getdi qabağa. Şaha, Xana, Bəyə etdikləri kimi, Çara, Canişinə, Pristava, Naçalnikə, Rəisə, Katibə, Şefə, Məmura ... üzüyuxarı bütün Rəyasətə Şahqululuq, Xanqululuq, Bəymalılıq, Maqqululuq etdilər. Bütün vəzifə-dəlmədeşikləri tutdular.

Tək-tək Alpları görüncə pıtraqlaşdılar, bizləndilər, nizələndilər.

Bütün kürsülərdə Şah yerinə Şahqulu, Xan yerinə Xanqulu, Bəy yerinə Bəymalı, Alp yerinə Maqqulu oldular. Tarixi sovurub, yerinə Dalqabaq yazdılar bu balqabaqlar.

Yan-yörələrinə özləri kimi şahquluları, xanquluları, bəymalıları, maqquluları yığdılar.

Mitinqlərə toplandılar, partiyalara basıldılar, klanlara dürtüldülər, bölündülər, tirələndilər, ora-bura təpildilər, dartıldılar (amma daranmadılar!) ... yenidən bir Axura bağlandılar, Sabirin “Tanrı buna şahid – quzu, keçiyik biz!..” şeirinə marş bəstələyib bir ağızdan komsomol-komsomol oxudular, yenidən səf-səf düzülüb seçkilərə getdilər – şahqulunun şahqulusuna, xanqulunun xanqulusuna, bəymalının bəymalısına, maqqulunun maqqulusuna səs verdilər – quqqulu-quqqulu.

Bu minvalla özlərinə Baş Şahqulu qayırdılar. Sevindilər, hurreyy dedilər, çalıb-çağırdılar, çəpik çaldılar. Oynadıqları həyat – Diringə.

# 2285 dəfə oxunub

Oxşar xəbərlər

"Belə mətnləri yazmaq sənətkarlıq tələb edir" - Hekayə müzakirəsi

"Belə mətnləri yazmaq sənətkarlıq tələb edir" - Hekayə müzakirəsi

14:00 15 aprel 2025
Labroides - Nahid Hacıyevin yeni hekayəsi

Labroides - Nahid Hacıyevin yeni hekayəsi

09:00 15 aprel 2025
"Mən də elə bildim, bu yazını yaşlı, təcrübəli adam yazıb" - Sabir Rüstəmxanlı

"Mən də elə bildim, bu yazını yaşlı, təcrübəli adam yazıb" - Sabir Rüstəmxanlı

12:00 13 aprel 2025
"Kişisən, oxuyandan sonra bacardığın kimi söy" - Arif Acaloğlunun məktubu

"Kişisən, oxuyandan sonra bacardığın kimi söy" - Arif Acaloğlunun məktubu

17:00 10 aprel 2025
AzDrama niyə bu gündədir? - Firuz Mustafa

AzDrama niyə bu gündədir? - Firuz Mustafa

12:00 10 aprel 2025
"Məhbuslar dənizdə batırılırdı, o vaxt Bakıda balıq ətindən kütləvi zəhərlənmə olmuşdu" - Ruhulla Axundovu niyə öldürmək istəyirdilər?

"Məhbuslar dənizdə batırılırdı, o vaxt Bakıda balıq ətindən kütləvi zəhərlənmə olmuşdu" - Ruhulla Axundovu niyə öldürmək istəyirdilər?

09:00 10 aprel 2025
#
#
# # #