Kulis.az Cavid Qasımovun yeni şeirlərini təqdim edir.

Yağışın daşdırdığı gölməçələrin
Pıçıltıları uzun çəkir.
Dünən gecə eşitdim,
Gileylənirdilər,
Orta yaşlı kişinin ayağının altını islatmasından sonra
Üzlərinə söyülmələrindən.

Gileylənirdilər,
Ölkənin yoxsulluğunu nümayiş etdirən
Kənd yollarından.

Gölməçə - göyün güzgüsü,
Kasıblığın ölçüsü,
Təbəqə bölgüsüdür.

Dərinliyi olmadığından
Dayaz adamlardan seçilmir bulanıqlığı.
Dəniz olmaq arzusundan başqa içində heç nə yoxdur.
Qorxuludur,
Bir arzudan ötrü quruyub yoxa çıxmaq.
Gəldiyin yerə yoxa çıxa-çıxa
Lal-dinməz baxmaq.

Yağışın saldığı gölməçələrin
Yanından ötəndə əksinə baxma,
Yumub qulaqlarını,
Sürətini artır addımlarının.

İnsanın ilk öncə eşitmək qüsuru olur,
Sonra danışmaq...

***

Dəniz əkinə yararlı sayılmadığından
Qan tökülmür üstündə,

Ağaran saçlarında qayıqları sərxoş,
Gəmiləri ağır-ağır gəzdirər.
Qayıqları çevirər,
Gəmiləri batırar
Müharibədən ötrü ovcunu açanda.

Batmaq gözəldir
Limana məğlub qayıtmaqdan...

Gəmisənsə
Gözlərini qırpmadan
Təkgözlü mayaka sonuncu dəfə bax.
Şükür,
Şükür,
Təkcə gözlərimizə qırış düşmür
Dünyanın hər səmtə əsən küləyindən.

***

Yayın əvvəlində
Sünbül zəmisindən qovulan qarğaların ahı tutdu müqəvvanı.

Dərin yuxuya getdi
İnsan köynəyi altında
Dadını bilmədiyi sünbüllərin ortasında.

Şikayətlənmədi əynindəki
Bir dəst paltarından,
Yayın istisindən,
Qışın qarından,
Yerə mismarlanan ayaqlarından,
Qollarını açıb,
Kimsə tərəfindən qucaqlanmadığından.

Canındakı ağac olmaq qorxusundan,
Kölgəsini də hürküdər
Sonuncu qarğanın arxasıyca.

Ətrafına dən-dən səpilmiş insanların içində təksənsə,
Hürkütdüyün qarğaların arxasıyca baxıb
Dərindən ah çək,
Hardasa sənin geyimində biri
Yatdığı sünbül zəmisində oyanıb
Səsinə səs verəcək...

***

Qladiatorun duası

İçimizdəki çərpələng azadlığına
Fikir vermə, İlahi.
İpimizi möhkəm tut.

Dünən çərpələnglər gördüm
Göylərə yüksəldikcə
Lənət oxuyurdular
Azadlıqlarını qoruyan ipə!

Onlar hardan bilsinlər ki,
Edama sürükləyir azad olmaq istəyi
Bütün çərpələngləri?

Bizi çərpələng azadlığımızdan qoru, İlahi,
Çərpələng azadlığımızdan.

• Azərbaycanla Özbəkistan arasında mədəniyyət sahəsində əməkdaşlıq haqqında saziş təsdiqləndi
• Ədəbiyyat üzrə Nobel mükafatının qalibi açıqlandı
• Türkiyə və İtaliya arasında əməkdaşlıq – Arxeoloji tapıntıların müzakirəsi