Radiolarda Təbriz səsi - Ümid Nəccarinin yeni şeirləri

Radiolarda Təbriz səsi - Ümid Nəccarinin yeni şeirləri
15 aprel 2025
# 16:30

Bu gün şair Ümid Nəccarinin doğum günüdür.

Kulis.az müəllifi təbrik edir və onun yeni şeirlərini təqdim edir.

Qeyri-səlis poeziya

36 yaşıma...

36 yaşımı açıq-aydın söyləsəm,
hər gün bir loxma çörək üçün
şeirlərimi İsmayıl edirəm, desəm.
Sürgünlüyün qatarına mindiyimi,
bioqrafiyamı güllələyənlərin kim olduğunu qeyd etsəm.

Sən demə,
hər gün kitabların səhifələrində səhər yeməyi yeyirəm,
gecələr TV-lərdə müharibə xəbərlərindən sonra,
bədməstlər misali özümü qusuram,
yediyim inancları,
içdiyim andları küçənin tinində qusuram...

Bu 36-nın döngəsində,
aprelin 15-ci günündə,
Leysan yağmurunun səsinə diksinib,
"gözlərimdən iraq olsun" - deyirəm.

Şərqin bütün şər qüvvələrinin,
diktatorların qürur rəqsinin "off" düyməsini basıram gözlərimdə.

Hər il bugünkü gün şeirlərimin kiçik əllərindən yapışıram,
Hər il bu saatda bir yaş da azalıram...


Hər kəsin şeiri, heç kimin şeiri

Bir adamlıq darıxmaqdır adım
Axşam çökəndə bu şəhərə,
gecəyə yuvarlananda eşq saatım
gicgahıma sıxılanda sürgünlüyün mərmisi,
pasportumla silərəm alın tərimi,
Radiolarda Təbriz nəğməsi,
Üfuqlərin gözləri yaş.
Məndə yoxdur təlaş,
Məndə yoxdur həyəcan.
İliyimə qədər qaranlıqdır hər addım...
Bir adamlıq darıxmaqdır adım!

Xatirə minası

Həyatın savaş meydanında zərərsizləşdirilməmiş minalar kimi gizlidir xatirələr.
Ölümlə olumun arasında bircə hiss boyda.
Yetər ki, vaqonda yanında oturan qadının parfumu tanış gələ,
Yetər ki, taksidə qəfildən bir musiqi,
Bircə baxışın zaviyəsi,
Bir sərsəri yağışın səsi
sıxsın sənə son mərmisini.
Yetər ki, qəfildən dumana düşəsən,
Yetər ki, həyatın savaş meydanında
Xatirə minasına qurban gedəsən.


Kirayə evlər

Bu mövsümü yağışlar,
göyün qarğış qəlpələridir.
deşir kirayə evlərin tavanını...
Hər ləpir bir ayaqqabının yaddaşıdır
unudulur yolların köksündə...
Şamlar kölgəsizcəsinə ölür gecə məzarlığında
Buludlar vətənsizcəsinə
mən sənsiz...
Sənsiz sinə gərir küçələr üstümə.
qolunu sal boynuma, mən burdayam, dostum...
yağışın yuyulan yerində
unudulan yerində...

# 1411 dəfə oxunub

Oxşar xəbərlər

"Bu gün doğum günümdür, borclarımı düşünürəm" - Sevinc Elsevər

"Bu gün doğum günümdür, borclarımı düşünürəm" - Sevinc Elsevər

15:00 6 may 2025
Qız, xaliqin öləydi səni xəlq eləyəndə - Günün şeiri

Qız, xaliqin öləydi səni xəlq eləyəndə - Günün şeiri

12:10 6 may 2025
"Bu imanlı iblisi dəli cinə bağışla..." - Ağa Laçınlı

"Bu imanlı iblisi dəli cinə bağışla..." - Ağa Laçınlı

15:20 5 may 2025
Daşdan-daşa dəydi başım o zaman - Günün şeiri

Daşdan-daşa dəydi başım o zaman - Günün şeiri

11:01 5 may 2025
Əbəs yerə göz vurmurdu çadra altdan o qız mənə - Yeseninin "İran nəğmələri"

Əbəs yerə göz vurmurdu çadra altdan o qız mənə - Yeseninin "İran nəğmələri"

12:00 3 may 2025
Namaz qılmaq istədim, qulağım “Quran” səsi eşitmədi - Hikmət Orhunun şeirləri

Namaz qılmaq istədim, qulağım “Quran” səsi eşitmədi - Hikmət Orhunun şeirləri

12:00 1 may 2025
# # #