Azərbaycan Respublikası Mədəniyyət Nazirliyi və Gənclər və İdman Nazirliyi, Bakı Gənclər Mərkəzinin dəstəyi və“İRƏLİ” İctimai Birliyinin təşkilatçılığı ilə Azərbaycan Respublikasının Xalq şairi, Heydər Əliyev mükafatı laureatı, akademik Nəriman Həsənzadə ilə gənclərin görüşü keçiriləcək.

Kulis.az xəbər verir ki, tədbir “MədəniyyətimİZ” proqramı çərçivəsində 12 avqust, saat 17:00-da “Libraff”ın Park Akademiya filialında baş tutacaq.

Görüşdə Xalq şairi Nəriman Həsənzadə Azərbaycan ədəbiyyatı və poeziya mədəniyyətinin tarixi və inkişafı, müasir dövrümüzdə ədəbi dəyərlərin təbliği və gənclərin sağlam ruhda yetişməsinə dair fikirlərini bölüşəcək, habelə gənc yazıçı Nadir Yalçının moderatorluğu ilə “Azərbaycan ədəbiyyatı: zamanın fövqündə yaşanan hadisələr, gələcəyə baxış”, “Ümummilli Lider Heydər Əliyevin qələm adamları ilə dostluq münasibətləri” və “Gənclərin ədəbi yaradıcılığının inkişafı” mövzularında panel müzakirə aparılacaq.

Tədbirin bədii hissəsində müxtəlif milli rəqs nümunələri tamaşaçılara təqdim olunacaq.

“MədəniyyətimİZ” proqramı Azərbaycan incəsənətinin gənclər arasında təbliği, mədəniyyətin gündəlik həyat tərzinə çevirilməsi, gənclərin milli-mənəvi dəyərlərə xas və vətənpərvər ruhda yetişməsinə nail olmaq məqsədilə həyata keçirilir. Proqram çərçivəsində müxtəlif mədəniyyət nümayəndələri ilə musiqili, ədəbi-bədii və interaktiv görüşlərin təşkili nəzərdə tutulur.

• O, humanist yox, qatildir! - Hamletin sevgisinin və nifrətinin səbəbləri nələrdir?
• Xalq yazıçısı Yusif Səmədoğlunun 90 illiyi qeyd olundu
• “Regionlarda peşəkar teatr dərsləri” layihəsi davam edir