Azərbaycan Respublikası Gənclər Fondunun fərdi layihələr üzrə qrant müsabiqəsinin qalibi Məleykə Mirzəlinin həyata keçirdiyi “Türk dünyası hekayələrdə” layihəsi çərçivəsində “Türk dünyasından hekayələr” adlı kitab nəşr olunub.

Kulis.az xəbər verir ki, kitabda türk dünyasının müxtəlif ölkə və topluluqlarından olan çağdaş yazarların yaradıcılıq nümunələri yer alıb. Türk inanc sisteminin, etnoqrafik ünsürlərinin, milli dəyərlərinin, tarixinin, ədəbiyyatının və s. əks olunduğu hekayələr seçilərək Azərbaycan türkcəsinə uyğunlaşdırılıb və kitablaşdırılıb.

Antologiya aşağıdakı hekayələrdən ibarətdir:

Çağdaş ədəbiyyatımızdan Şəmil Sadiqin “Tanrının şeytan axtarışı” adlı hekayəsi;
Güney Azərbaycan ədəbiyyatından Ümid Nəccarinin “Ucalan bayraqlar, susmayan şüarlar” adlı hekayəsi;
Türk ədəbiyyatından Emre A.Aladağın “Qarğa lələyi” adlı hekayəsi;
Özbək ədəbiyyatından Şəhadət Uluğun “Böyük tənhalıq” adlı hekayəsi;
Qazax ədəbiyyatından Malik Otarbayevin “Son odun” adlı hekayəsi;
Qırğız ədəbiyyatından Gülzadə Stanaliyevanın “Nəzər” adlı hekayəsi;
Krım-tatar ədəbiyyatından Zera Bəkirovanın “Həyatımın ən ağır günü” adlı hekayəsi;
Tatar ədəbiyyatından Leis Zülqərneyin “Əlvida” adlı hekayəsi;
Türkmən ədəbiyyatından Toylu Canadovun “Təxəllüs” adlı hekayəsi;
Uyğur ədəbiyyatından Mahmud Muhammədin “Doppa haqqında” adlı hekayəsi;
Yakut ədəbiyyatından Arqafena Kuzminanın “Alaaci” adlı hekayəsi.

Kitabın 2024-cü il 28 sentyabr (15:00) tarixində Cəfər Cabbarlı adına Respublika Gənclər Kitabxanasında təqdimatı planlaşdırılır.

Qeyd edək ki, layihə rəhbəri Məleykə Mirzəli Bakı Dövlət Universitetinin “Türk dilləri” ixtisası üzrə doktorantıdır, həmçinin, BDU-da müəllim olaraq fəaliyyət göstərir. Müəllifin tərcüməsində bundan öncə “Çağdaş tatar hekayələri antologiyası” da yayınlanıb.

• Qardaşının ölümünü gizlədilər, həkimlər ona övlad qadağası qoydu - Anarın həyatdakı "Təhminə"si
• Azərbaycan 2025-ci ildə TikTok-da kimlərdən və nədən ilham aldı?
• “Sözün Tovuz fəsli” antologiyasının təqdimatı oldu