Hindistanlı yazıçı və ictimai xadim M.S.Savadattinin həyat yoldaşı Nəcəmunnisə Bəyim vəhşi meymunun hücumuna məruz qalaraq vəfat edib.

Kulis.az xəbər verir ki, bu barədə Hindistanın "NDTV" xəbər portalı məlumat yayıb.

Faciəvi hadisə ölkənin Koppal şəhərində baş verib. 91 yaşlı qadın evinin yaxınlığında gəzərkən qəfildən vəhşi heyvanın hücumuna məruz qalıb. Bu dəhşətli anlar küçədəki təhlükəsizlik kameraları tərəfindən anbaan qeydə alınıb. Anasına kömək etməyə çalışan qızı da meymunun hücumu nəticəsində yaralanıb. Hər iki zərərçəkən dərhal xəstəxanaya çatdırılıb. Yazıçının xanımının vəziyyəti əvvəlcə stabilləşsə də, sonradan qəfil pisləşib. Həkimlərin səylərinə baxmayaraq, qadın insidentdən bir gün sonra dünyasını dəyişib.

Hindistanda artan meymun təhlükəsi

Hindistanın bir çox şəhər və kəndlərində vəhşi meymunların (xüsusilə makakaların) insanlara hücumu getdikcə artan ciddi problemə çevrilib. Sürətli urbanizasiya və meşə sahələrinin qırılması nəticəsində təbii yaşayış yerlərini itirən bu heyvanlar qida tapmaq məqsədilə yaşayış məskənlərinə axışırlar. Dini inanclara görə meymunların müqəddəs (Hanumanın təcəssümü) sayılması və sakinlərin onları tez-tez yedizdirməsi heyvanların insanlardan qorxusunu azaldıb, onları daha aqressiv və tələbkar edib. Bir çox hallarda meymunlar qida qoparmaq üçün insanlara, xüsusilə də fiziki cəhətdən zəif olan yaşlılara və uşaqlara hücum edirlər ki, bu da bəzən ölümlə nəticələnən ağır travmalara, yaxud quduzluq və digər infeksiyaların yayılmasına səbəb olur.

• “Balaca səyyah” tamaşasının məşqləri davam edir
• Bakı Biznes Mərkəzi Mədəniyyət Nazirliyinin tabeliyinə verildi
• Məşhur rejissor yeni layihə ilə ekranlara qayıdır