Azərbaycan Dövlət Gənc Tamaşaçılar Teatrında yeni səhnə əsərinin – “Fiqaronun toyu” tamaşasının məşqləri davam edir.

Teatrdan Kulis.az-a verilən məlumata görə, fransız dramaturqu Pyer Bomarşenin 1784-cü ildə yazdığı eyniadlı pyes əsasında hazırlanacaq tamaşanın quruluşçu rejissoru Əməkdar artist Nicat Kazımovdur. Motsartın eyniadlı operasının musiqilərindən istifadə olunan tamaşanın quruluşçu rəssamı Mustafa Mustafayev, musiqi tərtibatçısı Zaur Rəşidovdur.

Tamaşada Əməkdar artistlər Kəmalə Müzəffər, İlham Əsədov, Rasim Cəfər, Sevinc Rzayeva, Elnur Hüseynov, aktyorlar Manaf Dadaşov, Sənan Kazımov, Bəhram Həsənov, Zülfiyyə Alhüseynova, Günel Məmmədova, Aydan Həsənzadə, Təhminə Məmmədova və başqaları iştirak edirlər.

Dövrün aristokrasiyasını lağa qoyan əsər əyləncəli, dinamik səhnələri, sevgi intriqaları ilə zəngindir. Qulluqçu Fiqaro evin xadiməsi Süzanna ilə evlənməyə hazırlaşır, lakin onlar üçün ilk baxışdan xeyirxahlıq edən ev sahibi qraf Almavivanın Süzannaya gözü düşüb və elə zifaf gecəsində onu ələ keçirməyə həvəslidir. Varlı və zəhmətkeş təbəqənin qarşıdurması ilə başlanan tamaşada hadisələr müxtəlif formalarla cərəyan edir.

Tamaşanın premyerasının may ayında olacağı planlaşdırılır.

• Ad günündə həbs olundu, səbəbsiz yerə güllələndi, ölümü ailəsindən gizlədildi - Şərifzadənin faciəvi həyatı
• Tənhalıq həsrəti - Rüstəm Dastanoğlunun hekayəsi
• Azərbaycanın Dövlət Bayrağı Gününə həsr olunmuş beynəlxalq musiqi festivalı keçirildi