DokuBaku Beynəlxalq Sənədli Filmlər Festivalı çərçivəsində keçirilən “DokuToor” proqramı martın 2-də işini tamamladı.

Kulis.az xəbər verir ki, Azərbaycan Respublikası Mədəniyyət Nazirliyi, Gənc Film İstehsalçıları Assosiasiyası və Azərbaycan Kinematoqrafçılar İttifaqının dəstəyilə həyata keçirilən proqramın sonuncu günündə sənədli kino həvəskarlarına rejissor Fariz Əhmədovun 2021-ci ildə “Ən yaxşı yerli sənədli film” nominasiyasında “iHuman” Mükafatına layiq görülmüş “Sonuncu”, Mətləb Muxtarovun 2022-ci ildə eyni kateqoriyada “iHuman” Mükafatına layiq görülmüş “12/35” və belçikalı rejissor Erin Makfersonun 2024-cü ildə DokuBaku festivalında “Tamaşaçı rəğbəti” mükafatını qazanmış “Bu gün ölü oyanmadım” qısametrajlı sənədli filmləri təqdim olunub.

“Bu gün ölü oyanmadım” filmi ağır depressiya keçirən, intihar barədə fikirləşən insandan bəhs edir.

“12.35” filmi müəllifin, uşaqlığını keçirdiyi məhəllənin keçmişini canlandırmaq, itirilmiş zamanı kinonun sehrli əli ilə bərpa etmək cəhdidir.

Fariz Əhmədovun “Sonuncu” filmi Kürdili adasının axırıncı sakini Vitali Proninin son günlərinin poetik üslubda təsviridir.

“Nizami” Kino Mərkəzində baş tutan tədbirdə filmlərin nümayişindən sonra rejissor Mətləb Muxtarov tamaşaçıların suallarını cavablandırdı. Öz növbəsində tamaşaçılar tədbirin təşkilatçılarına minnətdarlıqlarını bildirdilər və belə layihələrin tez-tez keçirilməsini arzuladılar.

“DokuToor” layihəsi AR Mədəniyyət Nazirliyi tərəfindən 4 iyul – 2 avqust 2024-cü il tarixlərində qeyri-hökumət təşkilatları üçün mədəni və yaradıcı sənayelərin təşviqi üzrə qrant müsabiqəsinin qalibidir.

• 20 sentyabr - Xankəndi, Xocalı, Xocavənd və Ağdərə şəhərləri günüdür
• Azərbaycanlı rejissorun təhsil haqqının yubadılmasına aydınlıq gətirildi
• Şekspir fantastikasını kətanda canlandıran rəssam - "Yay gecəsinin yuxusu"