Kulis.az Aqşin Evrənin “Ən qısa hekayə” müsabiqəsinə göndərdiyi “Güllənin üstünə yazılmış hekayə” (328 işarə) hekayəsini təqdim edir.
Güllələr fasiləsiz olaraq qapını döyürdü. O, əyninə qırmızı xalatını geyinib bayıra çıxdı:
- Eviniz yıxılsın. Kəsin də bu zəhrimarı. Baş-qulağımız getdi axı.
Atəş səsləri kəsildi. İki nəfər əli silahlı gəlib ərinin başını, onun isə qulağını kəsib apardı. Beş dəqiqədən sonra o, ərinin başsız bədənini qucağına sıxıb xısıldayırdı:
- Baş-qulağımız getdi... Başımız, qulağımız getdi.
