Kulis.az romanların motivləri əsasında çəkilmiş səkkiz ən yaxşı filmi təqdim edir.

“Şouşenkdən qaçış”

Stiven Kinqin eyniadlı romanı əsasında çəkilən filmin ssenari müəllifi və rejissoru Frenk Darabontdur. Film “Şouşenk” həbsxanasında günahsız yerə 20 il məhkumluq həyatı yaşayan bankir Endi Dyufreynin həyatından bəhs edir. Məzmununa və reallığı dolğun şəkildə əks etdirdiyinə görə tənqidçilər tərəfindən müsbət qiymətləndirilib. Bütün dövrlərin ən yaxşı filmlərindən hesab olunur.

“Xaç atası”

Mario Püzonun 1969-cu ildə işıq üzü görmüş eyniadlı romanı əsasında Frensis Ford Koppolanın lentə aldığı film bütün zamanların 250 ən yaxşı film siyahısına daxil edilib. 1945-1955-ci illər arasında olan hadisələri işıqlandıran film Amerikada məskunlaşan Sicilya ailəsinin həyatından bəhs edir.

“Şindlerin siyahısı”

Tomas Kennilin “Şindlerin qövsü” romanı əsasında çəkilmiş filmin rejissoru Stiven Spilberqdir. Ekran əsəri Oskar Şindler adlı iş adamının İkinci Dünya Müharibəsi zamanı mindən çox Polşa yəhudisini öz fabrikində işə alaraq Holokostdan xilas etməsindən bəhs edir. Film 7 nominasiya üzrə Oskar mükafatına layiq görülüb.

“Döyüşçü klubu”

Çak Palanikin romanının motivləri əsasında Devid Finçerin lentə aldığı triller Hollivudun ən uğurlu ekran əsərlərindən hesab olunur. Filmin baş qəhrəmanı olan otuz yaşlı Edvard Norton avtomobil şirkətində çalışır və işi ilə bağlı tez-tez ezamiyyətlərə çıxmalı olur. Onun yeknəsəq həyatı döyüş klubu ilə tanışlıqdan sonra tamamilə dəyişir.

“Üzüklərin hökmdarı”
Con Ronald Ruel Tolkinin İkinci Dünya Müharibəsi dövründə qələmə aldığı roman 2002-ci ildə Piter Cekson tərəfindən ekranlaşdırılıb. Filmdə üç hekayətdən bəhs olunur. Froda və Sam üzüyü məhv etmək üçün Mordora yollanarkən onun əvvəlki sahibi Qollumla rastlaşırlar. Film 1 milyard dollar gəlir əldə edib.

“Qu quşu yuvası üzərindən uçuş”
Ken Kizinin eyniadlı romanı əsasında Miloş Formanın lentə aldığı ekran işi Amerika Film İnstitutunun “100 ən yaxşı film” siyahısında 33-cü sıraya daxil edilib. Bununla yanaşı film 5 Oskar mükafatı qazanıb.
Ruhi xəstələrin həyatından bəhs etdiyi üçün film, demək olar, bütünlüklə Oreqon ştatındakı xəstəxanada lentə alınıb. Ekran əsəri özünü ruhi xəstə kimi qələmə verən məhkumdan bəhs edir.

“Tanrıların şəhəri”
Paulo Linsin eyniadlı romanı əsasında Fernando Meirelles və Katia Lundun lentə aldığı film 1960-cı illərdə bir məhəllədə yaşayan uşaqların ağır həyatından bəhs edir.

“Quzuların səssizliyi”

Tomas Harrisin eyniadlı romanı əsasında Conatan Demmin ekranlaşdırdığı film 5 nominasiya üzrə Oskar mükafatına layiq görülüb. Naməlum qatil qadınları öldürür və onların dərisini soyur. Federal Təhlükəsizlik Bürosunun əməkdaşları qatili zərərsizləşdirmək üçün kömək məqsədilə keçmiş psixiatr və manyak Hannibal Lektora müraciət etməli olurlar.

• Korluq - mənim içimdədir... - Rayner Mariya Rilke
• Uçuq ev, xatirəni danışacaq kimsənin olmaması, sandıq... - Nadir Yalçının hekayələri oxucuya necə təsir edir?
• Şöhlət İxtiyaroğlu: “Kitabların qiymətinin baha olması oxucuları narazı salır”