Ultra Production və Cinex Production birgə istehsalı olan rejissor Elvin Adıgözəlin “Mənim sehrli dünyam” tammerajlı bədii filminin dünya premyerası nüfuzlu “goEast” kino festivalında baş tutacaq. Film festivalın 14 filmdən ibarət əsas müsabiqə proqramına daxil olub və 28 aprel 2025-ci il tarixində nümayiş olunacaq.

Kulis.az xəbər verir ki, film rayonun kənd ansamblında çıxış edən və Bakıda musiqili televiziya şousunda iştirak etməyi arzulayan iki uşaqlıq dostu – Babək və Sahilin hekayəsindən bəhs edir. Televiziya şousuna aparan yol onların dostluqlarını sınağa çəkir.

Filmdə aktyorlar Cahangir Məlikov, Kamil Nazim, Kəmalə İsrafilova, Yusif Dadaşov, Ramiq Nəsirov, Xalıq Bəkirov, Zülfiyyə Nəzir Məmmədova, Zemfira Abdülsəmədova, İlqar Dadaşov, Mahir Mirişli, İskra Tarrant, Aygül Sadıqova, İntiqam Hacılı və digərləri rol alıb.

Filmin prodüserləri Emil Nəcəfov (Ultra production) və Mariya İbrahimova (Cinex production), ko-prodüserləri Olqa Matat, Sergey Konnov və Vlad Dudko (Evos Film, Ukrayna), operatoru Natiq Hüsiyevdir.

Elvin Adıgözəlin həm də ssenari müəllifi olduğu “Mənim sehrli dünyam” filmi istehsalat dövründə When East Meets West kino forumunun First Cut Lab və First Cut Plus proqramlarında iştirak edib və TRT (Türkiyə) televiziya kanalının mükafatına layiq görülüb.

Qeyd edək ki, 25-ci “goEast” festivalı 23-29 aprel tarixlərində Almaniyanın Visbaden şəhərində keçiriləcək. Festival əsasən Mərkəzi və Şərqi Avropa filmlərinə fokuslanır və hər il festival çərçivəsində təqribən 110 bədii, sənədli, qısa metrajlı və VR işləri nümayiş etdirilir. Festival Şərq və Qərb arasında dialoq forumu funksiyasını yerinə yetirir.

“Mənim sehrli dünyam” rejissor Elvin Adıgözəlın dördüncü tammetrajlı filmidir. Bundan əvvəl o, “Buqələmun”, “Qaranlıqdan reportaj”, “Biləsuvar” kimi uğurlu filmlərə imza atıb.

• "Qladitator"un ulduzundan pərəstişkarlarına sərt xəbərdarlıq: "Kim özünü axmaq kimi aparsa..."
• Azərbaycan karikatura sənətinin banisi kimdir?
• "Sən demə, o da mənim pullarımı yeyirmiş" - Aktyordan etiraf