Kulis.az rus şairəsi Anna Axmatovanın şeirlərini şair, bu gün 55 yaşını qeyd edən Ramiz Qusarçaylının tərcüməsində təqdim edir.

Sakit-sakit axır Don,

Ötür gecə səsindən.

Diksinir Ay işığı

Bir İnsan kölgəsindən.

Dolub sahildə qadın,

Nə qazandı həyatda;

Əri qəbirdə yatır

Oğlu da qazamatda...

***

Mən badə qaldırıram

Viran qoyduğun evə,

Və... səni sevə-sevə,

İçirəm yoxluğuna,

Bir də gözlərindəki

Ölü soyuqluğuna, ikilikdə təkliyə...

Tanrı da bu sevgini

Xilas etmədi deyə...

***

Mən qulaq asmırdım qapı dalından,

Səni izləmirdim səndən gizlicə.

Mən sənə güvəndim inandım sənə -

Bilmədim, sən məni aldatdın necə...

İndi gəlib üzr istəyəcəksən ,

Niyə bağışlayım,

Nəyi və kimə...

Səni sevməsəydim bağışlayardım

Nə üzlə qaytarım səni qəlbimə?!

**

Söylə mənim adım nəyinə gərək,

Sahildə əriyən ləpələr kimi,

Səsində qarıyan son kədər kimi

Dilinə dəyməmiş ölüb gedəcək...

Söylə, mənim adım nəyinə gərək,

Ölü iz qoyacaq and yerində o,

Yad dildə yazılan yazılar kimi

Qonub baş daşına cizgilənəcək...

Söylə, mənim adım nəyinə gərək,

Səni ki, könlümə yetirməyəcək,

Bir də o sevgini bitirməyəcək,

Öləcək meşənin decə səsi tək...

Bir güncə...

Qəlbinin qərib çağında

Kədərdən asılan tənhalığında

Həsrətin tarıma çəkilən vaxtı

Adım dodağına qayıdacaqdır...

• Bakı Dövlət Universiteti ilə Milli Kitabxana arasında memorandum imzalanıb
• Mədəniyyət işçiləri mənzillə təmin olunacaq? – Nazirdən açıqlama
• Beynəlxalq Muğam Mərkəzində aşıq musiqisi konserti keçirildi