Kulis.az tərcüməçi Azər Əhmədovun təqdimatında çağdaş Mark Strandın şeirlərini təqdim edir.

Adam və dəvə

Qırx yaşım tamam olan axşam

artırmada oturub papiros çəkərkən

hardansa bir adam və bir dəvə peyda oldu.

Heç biri heç nə demədi, amma

küçəboyu yeriyib uzaqlaşandan sonra

mahnı oxumağa başladılar. Nə oxuduqları

bir sirr kimi də qaldı mənimçün – sözləri

ayırmaq olmurdu, melodiya da həddən

ziyadə şərqsayağıydı. Şəhərdən çıxıb

çöllüyə getdikcə səsləri birləşib

qumları süpürən küləyin səsindən yuxarı qalxdı.

Oxumalarının möcüzəsi, adamla dəvənin

bu ilğımlı qarışığı bütün qəribə cütlüklərin

ideal bir imicini yaradırdı. Mən bu uzun illəri

belə bir gecə üçünmü yaşamışam? İnanmaq

istəyirdim ki, bəli, elədir, amma yoxluğa qarışan

adam və dəvə birdən oxumağı dayandırdılar,

qayıdıb təzədən şəhərə soxuldular. Gəlib-gəlib

artırmanın qarşısında dayanıb muncuq gözləri ilə

mənə baxıb dedilər: “Korladın. Hər şeyi korladın.”

Ana və oğul

Oğul ananın otağına girir və ananın

uzandiğı çarpayının başında dayanır.

Oğul inanır ki, ana ona həmişə dediyi

sözü deyəcək. Ki, sən mənim oğlumsan,

hər zaman mənim olacaqsan. Oğul əyilib

ananın dodaqlarından öpür. Dodaqlar

soyuqdur. Hisslərin basdırılması başlayıb.

Oğul sonuncu dəfə ananın əlinə toxunur və

dönüb göydəki bütöv aya baxır. Ayın

külrəngi işığı döşəməyə düşür.

Əgər ay danışa bilsəydi nə deyərdi?

Əgər ay danışa bilsəydi heç nə deməzdi.

• Film layihələri üzrə pitçinq nəticələrinin açıqlanacaq
• Nəsimi festivalında “Zamansız və məkansız” sərgisi nümayiş olunacaq
• Niderlandda Üzeyir Hacıbəylinin 140 illik yubileyi qeyd olunub