Kulis.Az şair Mətləb Ağanın şeirlərini təqdim edir.

***

Sənə bir söz deyəcəm;

bir az keçsin aradan...

bir qış gəlsin, üşüyək,

bir yaz keçsin aradan...

bir payız da darıxaq,

tərləyək bir yayı da...

onsuz da çoxdan keçib

ömrümüzün hayı da...

bircə vayımız qalıb

oturub ağlamağa;

bir gün “salam-əleyküm,

buyur öl, Mətləb Ağa...”

bilsən, bir kənara yaz,

bu həyat nəyin nəsi?

daha nəyinə lazım

o qızın xatirəsi...

budur, bu da illərin

qırışları üzündə...

hər güzgüyə baxanda

yorulursan özündən...

...sənə bir söz deyərdim,

bir baxdım, unutmuşam...

mən o sözü sən demə,

nə vaxtdı unutmuşam...

2013

***

Biri var bu şəhərdə;

desəm, sən tanıyarsan...

üzündən, nəfəsindən,

səsindən tanıyarsan...

səhər-axşam nə etsən,

onun üçün edərsən...

hara getsən hər dəfə,

o get deyər, gedərsən...

onun üçün sevmisən,

onun üçün nifrətin...

onun dediyi olur,

yalanın, həqiqətin...

gizlədərsən özündən,

onu tanıdığını;

ona yedirtsən belə

gözlərinin yağını...

...bir gecələr yatanda

tək arzuna çatarsan;

keçib güzgü önündə

ona baxıb yatarsan...

2013

***

Hər şey bir yol oluncadı,

sonra öyrəşəcəksən...

qapıdan qovsalar, çıxıb

bacadan düşəcəksən...

ürəyin də öyrənəcək,

bu dünyanın dilini...

yuvasından çıxaracaq

ağıllını, dəlini...

olsaydı, bir görünərdi,

Allah nəyinə lazım...

onun yerdə bir işi yox,

o öz göyünə lazım...

...sonra durub güzgüyə bax,

baxsan, əlbət gülərsən;

qulaqların əvəzinə

qoşa buynuz görərsən...

2001

***

Səni atdım, bağışla,

budur gələn əlimdən...

ölərdim, qorxmasaydım,

bu yaşımda ölümdən...

Eh, neyləyə bilərdik

axı bu sevgimizlə...

təzəsini istəyim

Tanrıdan hansı üzlə?..

Öz əlimdi, öz yaxam,

yaxşıdı hər şey demək...

tamam unutdum səni,

indi qalır ölməmək...

1997

***

Bircə görəydim səni,

on il bundan sonra da...

məni sevərsənmi sən,

qız, toyundan sonra da?..

Xatırlayarsanmı heç,

sevgimizi gün kimi?..

öpərsənmi şəkilimi,

bir ləçəklik gül kimi?..

Ancaq yollara baxma,

gəlmək fikrindən daşın...

qarğış da elə, qorxma;

tutacaq uzaqbaşı...

Beşik yırğalayarsan,

eh, toyundan sonra da...

məni sevərsənmi sən,

qadın, ondan sonra da?..

1997

• Maykl Duqlas Beynəlxalq Kinofestivalda iştirak edəcək
• Dözümlü xalqıma heykəl qoyulsun - Günün şeiri
• Zərifliyini itirdiyi üçün arvadından ayrılan yazıçı - Yaraşıqlı, amma vəfasız...