Kulis.Az Nicat Məmmədovun “Qutab qonaqlığı” hekayəsini təqdim edir.
"Ruslan Azəri" silsiləsindən...
Qəfil zəng Oqtayı diksindirdi. Tələsik dəstəyi götürüb Sabirin səsini eşitdi:
- Hə, Oqtay, necəsən? Nə var, nə yox? Hər şey qüvvədədi?
- Salamatçılıqdı, sağ ol. Haçan gəlirsən?
- Yarım saata çataram.
- Gəl, demək olar ki, hər şey hazırdı.
Söhbət Oqtayın çoxdandı Sabirə söz verdiyi qutab qonaqlığından gedirdi. Artıq qırx beş dəqiqədən sonra dostlar Oqtayın anası Səmayə xalanın bişirdiyi üç növ qutabı qatıq, narşərab və sumaxla ləzzətlə içəri ötürürdülər.
Axır ki, Sabir dözmədi, mətbəxin qapısını açıb dedi:
- Səmaya xala, əllərinizə sağlıq, yaman dadlıdı.
- Nuş olsun, oğlum, nuş olsun.
- Səmayə xala, hamısı əladı, ətnən də, balqabaqnan da, amma göynən olanların dadından doya bilmədim. Yeyirsən – qəribə yüngüllük verir, uçmaq istəyirsən, uçmaq... Bunun sirri nədədi?
- Ay bala, elə bir sirr-zad yoxdu. Axtardığımız təkcə ayaq altda olmur ki... Elə göyün özün götürək. Bəzən başımız üstündəkinə də əl atmalıyıq. Bir gəl bura, bax.
Bu sözlərdən sonra Səmayə xala masanın üzərindən uzun mətbəx bıçağını götürüb eyvana çıxdı. Sabirlə Oqtay da onun dalınca getdi. Səmayə xala bıçağı yuxarı uzadıb buludların arasından qəşəng bir göy tikəsi kəsdi. Mətbəxə qayıdıb onu masanın üstündə xırda-xırda doğradı, yaydığı lavaşın içinə səliqəylə düzdü, ağzını büküb sacın üstünə atdı. İki dəqiqədən sonra göy qutabı hazır idi.
- Sabir, oğlum, bir dadına bax...
- Hə, Səmayə xala, həmənki daddır, ləzzəti də həmənki ləzzətdir. Qəribə yüngüllük verir, uçmaq istəyirsən, uçmaq...
Nəhayət, vidalaşma vaxtı çatdı. Dostlar öpüşüb qucaqlaşdılar.
- Səmayə xala, hər şeyə görə çox sağ olun, – dedi Sabir. – Bu gün burada yaşadıqlarımı heç vaxt unutmayacağam!
- Tez-tez gəl, qadan alım. Həmişə mehriban olasız. Gələn dəfə gələndə özünü gecəyə sal. Gecə göy qutabının ayrı ləzzəti var. Ay-ulduznan olur.
Bizi Telegram-da izləyin
t.me/kulis_az
Bizi Instagram-da izləyin
Bizi Facebook-da izləyin
Bizi Twitter-da izləyin
