Azərbaycan futbolu deyəndə hamımız üzümüzü turşudur, ironiya edir, lağa qoyuruq. Millimiz sonuncu oyunda slovaklara darmadağın oldu. Düzünü desəm, oyuna baxmadım.

Sağ olsun sosial media, bar-bağırırdı ki, rüsvay oluruq. Stadionda “AFFA istefa, AFFA istefa” şüarları sosial şəbəkələrə də yayılmışdı. Azarkeşlər bir şeyi başa düşmürlər, duymurlar ki, AFFA-dakılar istefa versə belə Tanrı bizim ölkəyə futbol bəxş etməyib. Zorla deyil axı. Olmur. Alınmır. Tanrı futbolu Latın Amerika zonalarına hədiyyə edib. Biz futbolda tamaşaçı ola bilərik, oyunu şərh edə bilərik. Futbolçu yetişdirmək bizlik deyil. Latın Amerika dedim, orda təkcə futbol yox, ədəbiyyat da, inqilabçılar da sözünü deyib.

Azərbaycan və futbol. Biz futbol ölkəsi deyilik. Bu iki ifadə eşidilən kimi adamda kinayə dolu təbəssüm yaranır.

Niyə bölgələrimizdə futbol yoxdur? İsmayıllıda, Şəkidə, Qubada, Qusarda, Kürdərmirdə, Salyanda, Qazaxda, Lənkəranda, Astarada, Naxçıvanda, Mingəçevirdə, Şamaxıda, Yevlaxda və digər adını çəkmədiyimiz rayonlarımızda futbol adına bir şey yoxdu. O zaman biz hansı futboldan danışaq?

Uşaq futbolundan da danışaq. Danışsaq guya faydamız olacaq. Uşaq yaşlarımda futbol meydanlarından əl çəkməzdim. Bütün günü oynayardıq, qar, yağış demədən. İndi baxıram, məhəllələr, stadionlar boş, bir-iki uşaq topa könülsüzcə toxunurlar. Bu mənzərələr mənə çox toxunur. Daxilən içimdəki futbol sevgisi qar dənəcikləri kimi əriyib yoxa çıxır. Üstəlik də Azərbaycan futbolunun bu günü də.

Atam beynəlxalq futbol çempionatlarına tamaşa edərdi. Həmişə kasıb, iqtisadi cəhətdən zəif ölkələrə daha çox azarkeşlik edərdi və bu sevgini bizə də aşılayardı. Heç unutmaram, daha çox Afrika ölkələrinin tərəfində olardı; Qana, Kamerun, Seneqal, Fildişi Sahili, Anqola və s. Bir də yadımdan çıxmayan bir cümləsi var: "Kasıbların futbolu da kasıb olur!”

Amma bizim futbol heç kasıb da deyil. Məzmunsuz, darıxdırıcı bir film kimidir. Rejissor olsaydım, bizim futbolumuzdan kədərli bir film çəkərdim. Elə çəkərdim ki, qoy dünya görsün, biz də futbol doğulmayıb. Amma futbola necə aşiq xalqıq.

Nə qədər yazsaq, müzakirələr etsək də ölkəmizdə futbol canını tapşırmaq üzrədir. Gedib Joze Mourinyonu, Zinəddin Zidanı, Fatih Terimi də gətirsən, biz düzələn deyilik. Qısası, futbolumuzdan əlimizi üzək!

• Dilənçi və dönərçi - Yaşar Bünyadın yeni hekayəsi
• Fransız yazıçı "Koroğlu" dastanını öz adıyla çap etdirmişdi... - ARAŞDIRMA
• “Xurşidbanu Natəvan” yenidən Milli Dram Teatrının səhnəsində