İynəyarpaqlıların tozundan asqırıb özümüz haqqında olmazın şübhələr yaratdığımız, yaz depressiyası yaşadığımız günlərin birində millət vəkili Siyavuş Novruzovun qatıldığı canlı yayımla gündəmi dəyişdi və yeni gündəm 3 gündür səngimir.

Doğrusu, bu debatın hansısa sosial-ictimai sıxıntıya məlhəm olub-olmadığını deyə bilmərəm, amma həmin söhbət kefimizi yaman açdı.

Ümumiyyətlə, Azərbaycanda debatlar çox vaxt başından böyük mövzuları hədəfə alır və effektsiz qalır. Tam da bu üzdən verilişə ovqatı xoş gələn deputatımızın yanındayam.

Ancaq görəsən, Siyavuş Novruzov bu rahatlığı hardan qazanır?

Yəqin, səhhətində olduqca ağır problem var və bu problem Siyavuş müəllimin gözündə çox şeyin mənasını dəyişib. Dünyaya həqiqətən də “üç günlük” bir şey kimi baxır və indən belə heç bir cəzadan, vəzifə itkisindən çəkinəcəyi yoxdur.

Novruzovun son 2-3 ildə yaşadıqları və açıqlamalarını ayıq başla lentə alan olsa, rahat bir Kusturitsa filmi çıxar.

“Seyid”lə debata bu şəkildə qatılmağın özü isə ayrı bir filmdir.

Üstümüzdə Allah var, Mirmahmud kişi centlmen adam imiş, dəfələrlə opponentini sudurmaq fürsəti oldu, sadəcə “aydındır” deyib üstündən keçdi, opponentinin deyil, problemin özünün üstünə getməyə çalışdı.

Debatın 13-cü dəqiqəsində Siyavuş müəllimin yaşadığı çətinlik doğrusu məni çox narahat etdi. Nəyisə unutdu, hansısa sözü axtardı, ipucu umdu... Ürəyim ağrıdı. İmkanım olsaydı, əlimə lüğət kitabı alıb yanına qaçardım, ilk sözümüz olan “abajur”dan üzü o yana bütün sözləri tez qulağına pıçıldayardım ki, birinin üstündə dayansın.

“Göydən düşən adam” deyib söz axtarmağı kədərli idi və amansız sosial şəbəkə istifadəçiləri onun axtardığı sözə uyğun çoxlu alternativlər verdilər: Qaqarin, Hacıleylək, zənbil, səbət, gilas və s.

Siyavuş müəllim isə sən demə “alpinist və turist” sözlərini axtarırmış...

Siyavuş müəllim, elə son debatda əzib-üzüb oxuduğu şeirdə deyildiyi kimi, axı dünya fırlanır, alpinist də, turist də sonda zirvədən paraşütlə enir. Əsas odur ki, paraşüt açılsın.

Sizin həmin zirvəyə özünüz demişkən vertolyotla, yoxsa quş yuvalarını, ilan yuvalarını əlləyə-əlləyə qalxdığınızı bilmirəm, əsas odur zamanı gələndə normal enə biləsiz.

Turist, alpinist gəldi-gedərdir.

Hətta zirvə də!

Əsas paraşütdür...

• Xalq artisti beyin infarktı keçirdi
• Rasim Balayevin ailəsində ağır itki
• Filarmoniyada Zəfər Gününə həsr edilmiş konsert olub