Qaraqanı qısqanmaq

Yazarlar

Ana səhifə
Yazarlar

Qaraqanı qısqanmaq

1 iyun 2011

14:39

Qaraqanın “A” romanını oxuyanda hələ Milli Kitab Mükafatının adı da yox idi.
Bu roman haqda mənə 15 yaşlı bir oxucum yazmışdı.
Özü mənə bağışladı kitabı.
Birnəfəsə də oxudum.
O 15 yaşlı qızın, Məryəmin ürəyinə dolmuşdu bu kitab.
O zaman da bu kitab çox satılırdı.
Gənclər bu haqda çox danışırdılar.
Sonra da bu əsər mükafat da aldı.
Bilirəm, mənim bu əsər haqda rəyim eyni cəbhədə olduğum yazarlar tərəfindən xoş qarşılanmayacaq.
Olsun!
Bu kitab sekta ədəbiyyatıdır.
Özünü HOST sektasına aid edən yüzlərlə, minlərlə yeniyetmə var.
Onlar üçün bu kitab müqəddəs bir kitabdır.
Bir marksist üçün “Kapital” nədirsə, bir müsəlman üçün Quran nədirsə, HOST-çular üçün da “A” odur.
Bu kitabın oxucuları eyni zamanda bu kitabın fanatlarıdır.
Sekta ədəbiyyatının ölkənin milli mükafatını almasını mən yaxşı hal saymıram.
Eləcə də romanın böyük bir roman olduğunu düşünmürəm.
İnanmıram ki, gələcəkdə Qaraqan böyük bir yazıçı olacaq.
Adətən, bu yaşdan kütləvi zövqün arxasınca qaçanlar sonralar ictimai şüuru silkələyən əsərlər yazmağa həvəs göstərmirlər.
Lakin fakt budur ki, Qaraqan bu sektanı yaratmaqla və bu kitabın PiaRını qurmaqla böyük uğur qazanıb.
Bu uğuru alqışlamaqdan başqa əlacımız yoxdur.
Azərbaycanda kitabın nə nüfuzu var ki?
Amma Qaraqan minlərlə gənc əli kitaba uzatmağa vadar elədi.
Başqaları ucuz kafe künclərində bir-birinin şəninə sağlıq deyərkən, o oxudu, yazdı, mahnı bəstələdi, müzikl səhnəyə qoydu.
Və bu uğurun qarşısında o tənbəllər indi qısqanırlar.
Onun yazdığı əsərin keyfiyyəti, əlbəttə ki, yüksək deyil.
Lakin ədəbiyyata marağın öldüyü bir ölkədə bu qədər kitab satmaq asan işdirmi?
Uğuru alqışlamaq lazımdır.
Çünki müasir dünyada ədəbiyyat yalnız mədəni hadisə deyil, eyni zamanda bir iqtisadiyyat, bir marketinq məsələsidir.