Xalq artisti Şəfiqə Məmmədova “İstiqlal” ordeni ilə təltif edilib.

APA xəbər verir ki, bununla bağlı Prezident İlham Əliyev Sərəncam imzalayıb.

Sərəncamda qeyd olunub ki, Şəfiqə Haşım qızı Məmmədova Azərbaycan mədəniyyətinin inkişafında böyük xidmətlərinə görə təltif edilib.

Azərbaycan Respublikasının Prezidenti İlham Əliyev həmçinin Xalq artisti Şəfiqə Məmmədovanın 80 illik yubileyi münasibətilə təbrik də ünvanlayıb.

Kulis.az xəbər verir ki, təbrik məktubunda deyilir:

"Sizi – teatr və kino sənətimizin görkəmli nümayəndəsini 80 illik yubileyiniz münasibətilə səmimi-qəlbdən təbrik edirəm.

Siz Azərbaycan mədəniyyətinin inkişafına dəyərli töhfələr vermiş sənətkarsınız. Özünəməxsus ifa tərzinizə sadiq qalmaqla mənəvi aləminə ustalıqla nüfuz edərək yaratdığınız dolğun, dramatik obrazlar hər zaman həyatiliyi ilə seçilmiş və yaddaşlarda silinməz iz qoymuşdur. Milli Dram Teatrının səhnəsində canlandırdığınız müxtəlif xarakterlər və kinematoqrafiyamızın qızıl fondunda fəxri yer tutan filmlərdə uğurlu ekran həyatı verdiyiniz qəhrəmanlar Sizə geniş şöhrət qazandırmışdır.

Aktyorluq sənətinin sirlərinə gənclərin yiyələnmələri üçün mahir pedaqoq olaraq böyük əmək sərf etmisiniz. Ölkəmizin mədəni-ictimai həyatında fəal iştirakınız vətəndaş mövqeyinizin bütövlüyünün bir təzahürüdür.

Yaradıcı şəxsiyyət kimi səmərəli fəaliyyətiniz daim yüksək qiymətləndirilmiş və dəfələrlə təltiflərə layiq görülmüşdür.

Sizə bu əlamətdar gündə ən xoş arzularımı yetirir, möhkəm cansağlığı və nailiyyətlər arzulayıram".

• “Melodiya” Vaqif Mustafazadənin caz albomunun rəqəmsal versiyasını buraxdı
• "Sevinc Çılğın bu şansı qaçırtdı" - Hekayə müzakirəsi
• İkinci Opera Günləri "Otello"nun premyerası ilə yekunlaşdı